Almatyda Abaı kúni qalaı atalyp ótedi

ALMATY. KAZINFORM — Almatyda Abaı kúnine oraı qandaı is-sharalar ótetini belgili boldy.

10 tamyz — qazaqtyń uly aqyny, jazýshy, qoǵam qaıratkeri, aǵartýshy, qazaq jazba ádebıeti men ádebı tiliniń negizin qalaýshy Abaı Qunanbaıulynyń kúni.

Almaty qalasynyń ákimdigi habarlaǵandaı, merekelik dataǵa oraı 7-11 tamyz aralyǵynda kitap kórmeleri, Abaı oqýlary, baıqaýlar men vıktorınalar, semınarlar men trenıngter, shahmat týrnıri, sondaı-aq «Abaı álemi» kontsert-spektakli sııaqty birqatar is-shara ótedi.

9 tamyzda 9:00-de Abaı alańynda (Dostyq jáne Abaı dańǵyldarynyń qıylysy) Abaı Qunanbaevtyń eskertkishine gúl shoqtary qoıylady. Odan keıin uly oıshyldyń shyǵarmashylyǵyna arnalǵan «Adamzattyń Abaıy» músháırasy josparlanǵan.

Oǵan Qazaqstan Jazýshylar odaǵynyń tóraǵasy Mereke Qulkenov, QR Májilis depýtattary, jazýshylar, ǵalymdar, zııaly qaýym ókilderi, stýdentter men qala qonaqtary qatysady. Sonymen qatar Abaı alańynda kitaptar men etnoónimder jármeńkesi uıymdastyrylady.

10 tamyz saǵat 16:00-de «Alataý» dástúrli óner teatrynda «Abaı álemi» kontsert-spektakli ótedi. Rejısser Farhad Moldaǵalıdiń jetekshiligimen Bolat Ábdilmanov, Erlan Bilál, Núrken Óteýil syndy tanymal akterler óner kórsetedi. Olar uly aqynnyń ómir joly týraly qoıylym kórsetip, Abaı shyǵarmashylyǵyndaǵy jahandyq taqyryptardy qozǵaıdy.

Sonymen qatar kontsertke «Mýzart» toby, Erden Jaqsybek, IL Canto toby, Steppe Sons toby, Ernar Amandyq jáne T.Júrgenov atyndaǵy Qazaq ulttyq óner akademııasynyń hory qatysady.

Apta boıy qalanyń barlyq derlik bilim berý ortalyqtary men kitaphanalarynda Abaıdyń óleńderi men qara sózderin mánerlep oqý boıynsha baıqaýlar ótedi. Túrksib aýdanyndaǵy komıýnıtı ortalyǵynda «Abaı Chess» shahmat týrnıri ótedi.

Qala turǵyndarynyń arasynda «Abaı Qunanbaıuly týraly ne bilemiz?» atty blıts-saýalnama júrgiziledi. Abaıdyń ómiri men shyǵarmashylyǵyna qatysty qyzyqty suraqtarǵa durys jaýap bergen azamattarǵa syılyq beriledi.