Almatyda 60-tan astam eskertkish retke keltirildi
ALMATY. KAZINFORM — «Almaty – bizdiń ortaq úıimiz» naýqany aıasynda qalalyq tarıhı-mádenı mura obektileriniń aýmaqtaryn keshendi tazalaý jumystary júrgizilip jatyr.
Almaty ákimdiginiń málimetinshe,megapolıste 60-tan astam eskertkish pen músin retke keltirildi. Onyń ishinde Táýelsizdik monýmenti, «Taǵzym» memorıaly, Sh.Ýálıhanov, N.Tilendıev, J. Jabaev, M. Áýezov, Á. Moldaǵulova men M.Mámetova eskertkishteri bar.
«Eskertkishter men bıýstter aýmaǵynyń mańaıyn qoqystan tazartylyp, músinder jýyldy. Úlken músinderdi tazalaý úshin sýarý mashınalary qoldanyldy. Sondaı-aq, eskertkishterdi vandalǵa qarsy jabynmen óńdeý jumystary josparlanǵan»,- dep atap ótti ákimdikten.
Aktsııa aıasynda, barlyǵy 100-den astam tarıhı-mádenı mura nysandary men 6 arheologııalyq qorǵan qamtylady.
«Taza Qazaqstan» respýblıkalyq ekoaktsııasynyń «Ónegeli urpaq» taqyryptyq aptalyǵy kóshetter men gúlder otyrǵyzý, sondaı-aq soǵys ardagerlerine, qarttar men múmkindigi shekteýli jandarǵa úı mańyndaǵy aýmaqty jınaýǵa jáne kómek kórsetýge baǵyttalǵan. Budan bólek, «Kórshińe kómektes» aktsııasy jalǵasyp jatyr.
Aıta keteıik, 8 sáýir men 8 mamyr aralyǵynda Almatyda «Almaty – bizdiń ortaq úıimiz» naýqany ótip jatyr.
