Almatydaǵy sýburqaqtar 1 mamyrda iske qosylady
ALMATY. KAZINFORM – Almatyda sýburqaqtardy iske qosý úshin daıyndyq jumysy júrgizilip jatyr.1 mamyrdan bastap Almatyda sýburqaqtar maýsymy resmı túrde bastalady. 56 kommýnaldyq sýburqaq kesheni iske qosylady, onyń 11-i «qurǵaq».
Sýburqaqtar kún saıyn saǵat 08:00-den 23:00-ge deıin jumys isteıdi. Olardyń jumysy 1 qazanǵa deıin sozylady. Bul rette, qoldanystaǵy erejelerge sáıkes +5°C tómen temperatýrada sýburqaqtardy paıdalanýǵa tyıym salynady.
– Mamandar sýburqaqtardy keshendi daıyndaýdy júrgizdi: tostaǵandar men irgeles aýmaqty tazartý, hlor men mys sýlfatyn paıdalanyp sýdy zararsyzdandyrý, jabdyqty boıaý jáne jóndeý, sondaı-aq barlyq ınjenerlik júıelerdi tekserý. Mundaı sharalar qalalyq sýburqaqtardyń qaýipsiz jáne turaqty jumysyn qamtamasyz etýge múmkindik beredi, - dep habarlady ákimdikten.
Sýburqaqtarǵa tehnıkalyq qyzmet kórsetý men sanıtarlyq jaǵdaıdy Almaty qalasy qoǵamdyq keńistikterdi damytý basqarmasynyń vedomstvolyq baǵynysty uıymy – «Eco Almaty» JShS qamtamasyz etedi.
Ákimdikten atap ótkendeı, qalanyń alty sýburqaǵyna aǵymdaǵy jóndeý júrgizý máselesi qarastyrlyp jatyr.
Osyǵan deıin Almatyda 15 jyl jóndeý kórmegen 4 iri sýburqaq jańǵyrtylatyny týraly jazǵan edik.
Sondaı-aq Respýblıka alańynda ornalasqan sýburqaq kesheni 4,5 mlrd teńgege jóndeletini belgili boldy.