Almaty oblysynda oqýshydan týberkýlezdiń ashyq túri anyqtaldy

QONAEV. KAZINFORM — Almaty oblysy Qarasaı aýdany Qaskeleń aýylyndaǵy mektepterdiń birinde oqıtyn oqýshydan týberkýlezdiń ashyq túri anyqtaldy.

Qarasaı aýdandyq bilim basqarmasy bul jaǵdaıdy rastady. Belgili bolǵandaı, A. S. Pýshkın atyndaǵy orta mektepte 18 qarasha kúni aýdandyq ortalyq aýrýhanadan arnaıy jyljymaly avtokólik kelip, 15 jastaǵy oqýshylardy flıýrografııaǵa túsirdi.

2024 jyldyń 20 qarashasynda mektep medbıkesine aýdandyq aýrýhanadan ftızıator mamany habarlasyp, 9-synyp oqýshysynan ashyq formadaǵy týberkýlez anyqtalǵanyn málimdedi. Aýyryp qalǵan oqýshy 19 qarashadan bastap sabaqta bolmaǵan.

Mektepte dereý sanıtarlyq epıdemıologııalyq jumystar qolǵa alynyp, synypta tazalaý jumystary júrgizildi. Juqpaly aýrý shyqqan synypty oqshaýlap, kabınette dezınfektsııalaý jumystary 5% gıpohlorıd eritindisimen jasaldy.

«Pán muǵalimderine jáne kishi qyzmetkerlerge týberkýlez aýrýy jaıynda sanıtarlyq-epıdemıologııalyq túsindirý jumystary júrgizildi. Al aýrý shyqqan synypqa oqshaýlanǵan bilim berý uıymdastyryldy. 22 qarashada oqý protsesi aıaqtalǵannan keıin mektep aýmaǵynda 4200 sharshy metr aýmaqta «Dezınfektsııa» JK mekemesi dızenfektsııa jumysyn júrgizdi», — delingen resmı jaýapta.

Qazir mektep aýdandyq sanıtarlyq-epıdımıalogııalyq (SES) basqarmasynyń qorytyndysyn kútip otyr. Keıin soǵan sáıkes, qosymsha tıisti sharalar qolǵa alynbaq.

Ázirge mamandar bilim alýshylarǵa qaýip joq ekenin atap ótti.

Osyǵan deıin, Almatyda balalar arasynda týberkýlez aýrýy kóbeıgeni týraly jazǵan edik.