Almaty oblysynda birneshe úıdiń aýlasyn sý basyp qaldy

QONAEV. KAZINFORM – Almaty oblysy Qosqudyq aýylyndaǵy bes turǵyn úıdiń aýlasyn erigen qar sýy basyp qaldy.

Tótenshe jaǵdaılar departamentiniń málimetinshe, aýa raıynyń kúrt jylynýyna baılanysty Qonaev qalasy Qosqudyq aýylynda qar qarqyndy erip, aýlalardy sý basqan. 

«Túrksib kóshesinde ornalasqan bes úıdiń aýlasy sý astynda qaldy. TJD jáne jergilikti atqarýshy organdarynyń kúshimen ınjenerlik tehnıkany (1 ekskavator) paıdalana otyryp jınalǵan sýdy burý jumysy júrgizilip jatyr. Oǵan departamenttiń 30 qyzmetkeri, 5 tehnıka jáne 3 motopompa jumyldyryldy. Qurbandar men zardap shekkender joq»,- dep habarlady vedomstvodan. 

Keshki saǵat 20:00-degi jaǵdaı boıynsha sý deńgeıi tómendegen. 

Turǵyn úılerdi sý basý qaýpi joq.