Almaty oblysynda 43 bas mal urlaǵan barymtashylar ustaldy
ALMATY. KAZINFORM — Almaty oblysynda mal urlyǵyna qatysty qylmys ashyldy.
Oblystyq polıtsııa departamentiniń málimetinshe, 15–16 sáýir aralyǵynda Uıǵyr aýdany Tasqarasý aýyly aýmaǵynda ornalasqan «Jer kópir» jaıylymynda belgisiz adamdar qoradan 43 bas iri qara maldy urlap áketken. Atalǵan derek boıynsha polıtsııa qylmystyq is qozǵap, jedel-izdestirý sharalaryn bastaǵan.
— Jedel is-sharalar barysynda Jetisý oblysy Jarkent qalasy aýmaǵynda Krımınaldyq polıtsııa basqarmasy qyzmetkerleri Uıǵyr aýdanyndaǵy áriptesterimen birlesip kúdiktilerdi ustady, — dedi Almaty oblysynyń polıtsııa bastyǵy Meıram Ábikeev.
Qazirgi ýaqytta 6 adam ustaldy. Olar 43 bas iri qara maldy urlap, ony ótkizip jibergenin moıyndaǵan. Kúdiktiler ýaqytsha ustaý ızolıatoryna qamaldy. Tergeý barysynda olardyń mal urlyǵynyń basqa da faktilerine qatystylyǵy tekserilip jatyr.
Eske salaıyq, buǵan deıin Almaty oblysynda kisi bopsalap, kóligin tartyp alǵandar ustaldy.
