Almaty oblysyna «Sergek» júıesi engiziledi
ALMATY. KAZINFORM – Almaty oblysynda qoǵamdyq jáne jol qaýipsizdigin qamtamasyz etetin ıntellektýaldy «Sergek» júıesin iske asyrý boıynsha aýqymdy joba bastaldy. Bul týraly Almaty oblysynyń tsıfrlyq tehnologııalar basqarmasy málimdedi.

Joba aıasynda oblys aýmaǵynda 9 myńnan astam qoǵamdyq qaýipsizdik kamerasy jáne 325 apparattyq-baǵdarlamalyq keshen ornatylady. Bul keshender joldar men qoǵamdyq oryndardy táýlik boıy baqylaýǵa múmkindik beredi.
Jobany iske asyrýǵa qajetti qurylys jumystary bastalyp ketti. Máselen, Jambyl aýdanynda 800 qaýipsizdik kamerasy ornatylyp, Talǵar aýdanynda nysandardy ornatý boıynsha qurylys jumystary júrgizilýde. Magıstraldy talshyqty-optıkalyq baılanys jelisin tóseý jáne búkil keshendi júıeniń turaqty jumysyn qamtamasyz etýge baǵyttalǵan daıyndyq sharalary qolǵa alyndy. Jobany tolyq aıaqtaý alty aıǵa josparlanǵan. Jol keshenderin ornatý núktelerin Almaty oblysynyń polıtsııa departamenti anyqtaıtyn bolady.
— Biz «Sergek» jobasy qaýipsizdik deńgeıin aıtarlyqtaı arttyrady dep senemiz. Almaty oblysynda tsıfrlyq transformatsııa belsendi túrde júzege asyrylýda. Jyldyń alǵashqy jartysynda tsıfrlandyrý salasynda 14,8 mıllıard teńge kóleminde qyzmet kórsetilip, (bul 124,6% ósimdi kórsetti) 300-den astam IT maman daıarlanyp, ınnovatsııalyq «Alatau Hub» ortalyǵy ashyldy, oqýshylar arasynda IT jobalar baıqaýy uıymdastyrylyp, memlekettik qyzmetkerlerge oqý-aǵartý sharalary ótkizildi. Mektepterde órt týraly habarlaıtyn júıeler men «Smart Qonaev» qosymshasy engizildi. Biz ınnovatsııalyq tehnologııalardy odan ári damytý baǵytynda jumys isteýdemiz, — dedi Almaty oblysynyń tsıfrlyq tehnologııalar basqarmasynyń basshysy Jandos Sabıt.
Joba aıasynda Almaty oblysynyń ár aýdanynda Jedel basqarý ortalyǵy (JBO) qurylatyn bolady. JBO búkil beınebaqylaý júıesiniń jumysyn úılestirip, kameralardan aqparat jınaý jáne óńdeýdi júzege asyrady. Sonymen qatar tótenshe jaǵdaılar men quqyqbuzýshylyqtar kezinde quqyq qorǵaý organdarynyń is-qımylyn úılestirýge múmkindik beredi.
Aıta ketý kerek, «Sergek» qaýipsizdik júıesi ınfraqyzyl stroboskoptardyń kómegimen kez kelgen aýa raıy jaǵdaıynda jáne táýliktiń kez kelgen ýaqytynda jumys isteı alady. Sonymen qatar, júıe adamdardyń bet álpetin tanyp, qylmyskerlerdi, tártip buzýshylardy nemese joǵalǵan adamdardy tabýǵa yqpal ete otyryp, qoǵamdyq oryndarda adamdardyń kóp jınalýyn anyqtap, qoǵamdyq is-sharalarda qaýip-qaterge jedel áreket etýge múmkindik beredi. Júıe jasandy ıntellekttiń (AI) kómegimen kóliktiń markasyn, modelin, túsin jáne túrin avtomatty túrde anyqtaı alady.
Sergek Group kompanııasynyń bas dırektory Evgenıı Kım Almaty oblysyndaǵy júıeni iske qosý kompanııa úshin mańyzdy mindet ekenin atap ótti.
— Tabıǵı-klımattyq jaǵdaılar men landshafttyń alýan túrliligi aımaqty týrıster úshin tartymdy etedi: bıyl oblysqa 1,6 mıllıon adam kelgen. Degenmen, jol-kólik oqıǵalarynan bolatyn ólim-jitim deńgeıi mańyzdy másele bolyp qalyp otyr. Bizdiń maqsatymyz — ozyq tehnologııalardy paıdalanyp, qoǵamdyq qaýipsizdikti qamtamasyz etý jáne Almaty oblysyn Smart City júıesin engizý boıynsha kóshbasshy aımaqtardyń qataryna qosý», — dedi Sergek Group basshysy.
Sondaı-aq, joba aıasynda oblystyń polıtsııa qyzmetkerlerine «Sergek Qorgau» mobıldi qosymshasyna arnalǵan 1000 jumys lıtsenzııasy, zamanaýı jetildirilgen kameralar jáne radarlarmen jabdyqtalǵan 10 «Sergek Patrol» kesheni beriletinin jáne kólik aǵyndaryn taldaý, baqylaý jáne boljaýǵa arnalǵan «Sergek ITS» ıntellektýaldy kólik júıesi engiziletinin atap ótti.
«Sergek» júıesi engizilgen aımaqtarda qoǵamdyq oryndardaǵy qylmys deńgeıi 40%-ǵa, al jol-kólik oqıǵalarynan bolatyn ólim-jitim 50%-ǵa tómendegen.
Eske salsaq, jalpyǵa arnalǵan joldarmen 25 tonnadan artyq júk tasyǵan kólikterge «Sergek» arqyly aıyppul salynady.