Almaty metrosymen bir kúnde 100 myń adam qatynaıdy
ALMATY. KAZINFORM — Almatyda kólik qozǵalysy qıyndap barady. Halyq sanynyń artýy sońǵy jyldary bul máseleni odan beter kúrdelindilip jibergen. Osy rette metro kópshilik úshin qolaıly transport bolyp tur. Qazir qalada 11 beket jumys isteıdi. Bul týraly Jibek Joly arnasynyń jańalyqtarynda aıtyldy.
Ázirge álemdegi eń jas metropolıten — Almatyda. Ortalyq Azııada Tashkentten keıingi ekinshi orynda. Almaty sekildi iri shaharda halyqtyń kópshiligi metroǵa mingendi jón sanaıdy. Jalpy metromen jylyna 30 mln deıin jolaýshy qatynaıdy eken.
Megapolıs turǵyndarynyń aıtýynsha, metro ázirge Almatydaǵy eń yńǵaıly kólik. Ári halyqtyń qaltasy kóteretin tasymal túri. Almatylyq Islam Baımaǵambetov jumysqa tek metromen qatynaıdy. Aıtýynsha, ol aqshamen birge, ýaqytyn da únemdeıdi.
— Metromen júrgenime eki jyldaı boldy. Óte yńǵaıly. Mysaly taksımen bir jerge bar bolsam ózińiz bilesiz óte qymbat. Al metromen jarty saǵatta 20 mınýtta tez jetip alam. Avtobýchpen baratyn bolsam bir saǵat prosto tak joǵaltam. Jumysqa týra kelem toǵyzda kelý kerek bolsa 8.30 otyram 5-10 mın jetip alam, - deıdi qala turǵyny Islam Baımaǵambetov.
Halyq sanynyń artqany sońǵy jyldary tek kólik keptelisinen emes, metrodaǵy adamdar keptelisinen de baıqalady. Metromen jıi júretin jolaýshylardyń sózinshe, qarbalas ýaqytta jerasty joly da adamǵa lyq tolady.
— Men stýdentpin. Metromen júrý óte yńǵaıly. Biraq metronyń óziniń mınýstary bar. Óte kishkentaı adamdar kóp. Uzartsa jaqsy bolady degen oıdamyn, - deıdi júrginshilerdiń biri.
Al, taǵy bir jolaýshynyń pikirinshe, poıyzdardy jıiletý kerek, sonda mundaı keptelis bolmaıdy. Júrý ýaqytynyń arasy alshaqtaý. Metro beketteriniń sanyn sheteldegideı kóp bolsa qaladaǵy keptelis máselesin túbegeıli sheshýge bolady.
Búginde álemdegi 62 eldiń 200 qalasynda metro bar. Eń kóbi Qytaıda — 46 metro júıesi jumys isteıdi.
Álemde eń uzyn metropolıten 831 shaqyrymdyq Shanhaı metrosy. Onda 14 jeli 508 beket bar. Jylyna 2 mıllıard jolaýshy qatynaıdy. Al eń tereń metro Phenıanda ornalasqan.
Almaty metropolıteni beketteriniń ishindegi qurylysy jaǵynan eń tereń ornalasqan Abaı beketiniń tereńdigi 78 metr. Oǵan túsý úshin bes mınýt ýaqyt qajet.
Sarapshylar metro qala úshin ekonomıkalyq jaǵynan ǵana emes, ekologııalyq jaǵynan da tıimdi joba deıdi.
— Metro eń az shyǵaryndylary bar jerasty kóligi bola otyryp, avtobýstar men avtomobılderdiń óte kóp sanyn aýystyrady. Sondaı-aq, atmosferany paıdalanylǵan gazdarmen lastamaıdy, bul qorshaǵan ortany saqtaýdyń mańyzdy faktory. 05.20 Ekonomıkalyq turǵydan árıne, metro bar aýdandarda jyljymaıtyn múlik baǵasynyń quny ósedi ıaǵnı bul ınvestıtsııalyq tartymdylyqty týdyrady, - deıdi ekonomıst Rasýl Rysmambetov.
Almaty metrosynda aldaǵy jyly jańadan Qalqaman beketi iske qosylyp, sodan keıin ekinshi jelini jobalaý bastalady. Ol qala ortalyǵyn Almaty-1 temirjol vokzalymen baılanystyrady.
— Halyqaralyq deńgeıge jetý úshin neǵurlym kóp stantsııa bolsa solurlym qalany tolyǵymen qamtamasyz etse sol kezde halyqaralyq deńgeıge jetemiz. Tarıhtan kórip turǵandaı metro salýǵa 20-30 jyl ýaqyt ketken kezder boldy. Ol árqalaı jaǵdaılarǵa baılanysty. Eger bıýdjetten aqsha bólinse bir beketti 3-4 jylda salýǵa bolady, - deıdi «Metropolıten» KMK qozǵalys qyzmetiniń basshysy Almas Qydyrálıev.
Qazir Qalqaman stantsııasynyń qurylysy júrip jatyr. Ol Alataý dańǵylynyń boıymen ótedi. Jańa ýchaskeniń jalpy uzyndyǵy 5 shaqyrym 300 metrdi quraıdy. Sosyn taǵy úsh beket salý josparlanǵan.
