Almaty ákimdigi atyshýly ıppodromdy satyp ala ma

ALMATY. KAZINFORM — Almatydaǵy ıppodrom tóńireginde birneshe ret túrli talqylaý bolǵan. Qala ákiminiń orynbasary Beıbit Shahanov nysannyń endigi taǵdyryna qatysty túsinik berdi. 

Ol ıppodrom kóp jyldan beri jekemenshikke tıesili ekenin jáne ıesi birneshe ret aýysqanyn aıtty.

— Kópshilik arasynda ıppodromdy buzyp, ornyna kópqabatty turǵyn úı salynýy múmkin degen qaýeset te tarady. Alaıda sizderge anyq aıta alamyn: qoldanystaǵy bas jospar boıynsha bul aýmaq ıppodrom bolyp qala beredi. Al qandaı da bir ózgerister engizý jobasy qarastyrylsa, biz sol jerde ıppodromnyń saqtalýy jóninde óz ustanymymyzdy qatań túrde talap etip otyrmyz, — dedi ol Óńirlik kommýnıkatsııalar qyzmetinde ótken brıfıngte.

Sonymen qatar ákim orynbasary ıppodromdy memleket satyp alatyny týraly másele talqylanyp jatpaǵanyn aıtty. Onyń sózinshe, ıppodrom da, basqa da nysandar sııaqty jekemenshik ıesinde bolyp-aq, qalypty túrde jumys isteı alady.

— Onyń tarıhı kelbetin saqtaý, qalypty jumys isteýi jáne óz mártebesine saı bolýy máselesine kelsek, bul baǵytta biz menshik ıelerimen birlesip jumys júrgizemiz, — dedi Beıbit Shahanov.

Eske salaıyq, buǵan deıin Almaty ıppodromy aýmaǵyna kópqabatty turǵyn úı salynatyny týraly taraǵan aqparatty joqqa shyǵarǵan edi.