Alkogol ónimderin satýǵa tyıym salynatyn oryndar sany kóbeıdi
ASTANA. QazAqparat - Qarjy mınıstrligi elimizde alkogol satýǵa tyıym salynatyn oryndardyń qataryn keńeıtip otyr. Bul týraly Parlament Májilisinde etıl spırti men alkogol óniminiń óndirilýin jáne aınalymyn memlekettik retteýge arnalǵan zań jobasynyń tanystyrylymy barysynda Qarjy vıtse-mınıstri Ardaq Teńgebaev aıtty.
Vıtse-mınıstrdiń sózine qaraǵanda, búgingi kúni bazarlarda, kóterme saýda bazarlarynda, dúńgirshekterde, sondaı-aq belgilenbegen oryndarda alkogol ónimderin satýǵa tyıym salynǵan. «Al jańa zań jobasymen buǵan densaýlyq saqtaý, bilim berý, balalar mekemeleriniń ǵımarattarynda, dene shynyqtyrý-saýyqtyrý, sport jáne sporttyq-tehnıkalyq qurylystarda tyıym salynatyn bolady. Sonymen qatar, avtojanarmaı quıý stansalarynda tyıym salý belgilenedi», - deıdi Ardaq Teńgebaev.
Toqtala ketetin jaıt, balalar mekemelerinde, bilim berý uıymdarynda jáne olarǵa irgeles 100 metr aýmaqta tyıym salý normasy qoldanystaǵy zańnamada qarastyrylǵan bolatyn. Qarjy mınıstrligi osy normany alyp tastaýdy usynady. «Biz «100 metr» tyıym salý aýmaǵyndaǵy talapty alyp tastaýdy usynamyz. Esesine, alkogol ónimderin 21 jasqa tolmaǵan adamdarǵa satqany úshin jaýapkershilikti kúsheıtýdi qarastyryp otyrmyz», - dedi vıtse-mınıstr.
