Alǵys aıtý kúni qazaqstandyqtardyń júreginde erekshe oryn alady

NUR-SULTAN. QazAqparat - Bul týraly elordalyq Dostyq úıi bazasynda QR Parlamenti Májilisi depýtattarynyń, Qazaqstan halqy Assambleıasy músheleriniń, sondaı-aq etnomádenı birlestikter basshylary men ókilderiniń qatysýymen ótken Alǵys aıtý kúnine arnalǵan dóńgelek ústel otyrysynda aıtyldy, dep habarlaıdy QazAqparat «Qoǵamdyq kelisim» RMM baspasóz qyzmetine silteme jasap.

Otyrysty asha otyryp, QR Aqparat jáne qoǵamdyq damý mınıstrliginiń «Qoǵamdyq kelisim» RMM dırektory Ǵ.M. Qusmanǵalı Alǵys aıtý kúniniń mańyzdylyǵyn atap ótti.

«Alǵys aıtý kúnin toılaý – bizdiń júregimizde erekshe oryn alady. Bul kún meıirimdilik pen dostyqtyń jarqyn merekesine aınaldy. Alǵys aıtý kúni – bul qıyn kezeńderdi bastan keshirgen jáne qysqa merzim ishinde ortaq kúsh-jigerimizben táýelsiz Qazaqstandy qurǵan elimizdiń barlyq azamattarynyń bir-birine degen qurmeti», – dep atap ótti ol.

QHA Hatshylyǵy meńgerýshisiniń orynbasary L.Prokopenko men Etnosaralyq qatynastardy damytý komıtetiniń tóraǵasy Ǵ.Shoıkın dóńgelek ústel qatysýshylaryn aıtýly kúnmen quttyqtaı otyryp, qoǵamdyq kelisim men jalpyulttyq birlikti nyǵaıtýǵa jáne saqtaýǵa at salysyp júrgen barlyq QHA múshelerine, etnomádenı birlestikter ókilderine jáne etnosaralyq qatynastar salasynda qyzmet atqaratyn azamattarǵa alǵystaryn bildirdi.

Sonymen qatar, Almaty qalasynda koronavırýsty jeńgen qart keıýana D.Karataevanyń nemeresi N.Jumabekov qatysty. Aýrýdy jeńe bilgen ájesiniń qazirgi jaǵdaıyn jáne qazirgi qalpyna kelý shaǵyn tolyq aıtyp bergen spıker N.Jumabekov: «Nátıjesinde jaqsy kórsetkishtermen ájemiz aýrýhanadan shyǵarylǵan kún onyń 100 jasqa tolýymen tuspa-tus keldi», – dep, aq halatty abzal jandarǵa alǵysyn jaýdyrdy.

Alǵys aıtý kúniniń tarıhy týraly aıta otyryp, «Qazaqstannyń orys, slavıan jáne kazak uıymdarynyń qaýymdastyǵy» Respýblıkalyq ZTB tóraǵasy V.Bojko, «Vaınah «sheshen jáne ıngýsh halyqtarynyń mádenıetin damytý qaýymdastyǵy» ZTB Basqarma múshesi ıÝ.Kelıgov, sondaı-aq QR Parlamenti Májilisiniń depýtattary A. Hamedov pen A. Amırhanıan qazaq halqynyń erekshe rólin atap ótti.

Sondaı-aq, qatysýshylar Qazaqstan halqy Assambleıasy jelisi boıynsha atqarylyp jatqan jumystarǵa toqtalyp, bul ınstıtýttyń jastarǵa rýhanı tárbıe, patrıotızm, beıbitshilik, dostyq pen tatýlyqty nasıhattaıtyn jańa jobalardy ortalyq deńgeıde de, jergilikti jerlerde de júzege asyrýdyń mańyzdylyǵyn atap ótti.