Alǵashqy basylymdaǵy «Hobbıt» kitaby aýktsıonda rekordtyq baǵaǵa satyldy
ASTANA. KAZINFORM – Dj. R. R. Tolkınniń áıgili «Hobbıt» romanynyń sırek kezdesetin alǵashqy basylymy onlaın-aýktsıonda 43 myń fýnt sterlıngke (49 500 eýro) satyldy. Bul – basylym úshin buryn-sońdy tirkelgen eń joǵary baǵa, dep habarlaıdy Auctioneum aýktsıon úıi.
1937 jyly alǵash ret jaryq kórgen bul basylym – tek 1500 dana taralymmen shyqqan túpnusqalardyń biri. Aýktsıon úıiniń málimetinshe, qazirgi tańda sol alǵashqy basylymnan birneshe júz ǵana dana saqtalǵan jáne olar zamanaýı ádebıettegi izdeýdegi kitaptar qatarynda jatady.
Atalǵan kitap Brıstoldegi bir úıdiń kitap sóresinen tazalyq kezinde kezdeısoq tabylǵan. Auctioneum mamany Keıtlın Raılı kóne jasyl muqabaly kitapty kórip, nazar aýdarǵan.
«Alǵashynda jaı ǵana erte shyqqan «Hobbıt» shyǵar dep oıladym, biraq paraqtaı bastaǵan sátte júregim atqaqtap ketti», – deıdi ol.
Basylymda avtordyń qara-aq ıllıýstratsııalary bar. Bul da ony erekshe etedi, sebebi keıingi nusqalarda sýretter túrli-tústi bolǵan.
Kitap Ulybrıtanııadaǵy jeke kollektsıonerdiń qolyna ótti. Oǵan deıin bul shyǵarma áıgili botanık Hıýbert Prıstlıdiń otbasylyq kitaphanasynda saqtalǵan.
Auctioneum málimetinshe, Tolkın men Prıstlı bir-birimen tanys bolǵan jáne ekeýi de K.S. Lıýıspen hat almasqan.
Aıta keteıik, «Hobbıt» pen «Saqınalar ámirshisi» — álem boıynsha 250 mıllıonnan astam danamen taralǵan, barlyq ýaqyttaǵy eń kóp satylǵan kitaptar qatarynda. Bul týyndylar 2000-jyldary kınofranshıza retinde de zor tanymaldyqqa ıe boldy.
Eske salaıyq, bir apta buryn Maıkl Djeksonnyń shulyǵy aýktsıonda 6200 eýroǵa satyldy.