Áleýmettik osal toptarǵa baspana alýda qandaı qoldaý kórsetiledi
ASTANA. KAZINFORM — Jyl basynan beri 7,3 myń jaldamaly páter jáne 10 myńnan astam sýbsıdııalanǵan ıpotekalyq nesıe berildi. Bul týraly Ónerkásip jáne qurylys vıtse-mınıstri Qýandyq Qajkenov eseptik kezdesýde aıtyp berdi.
Onyń aıtýynsha, 2025 jyldyń alǵashqy 11 aıynda 16,9 mıllıon sharshy metr turǵyn úı paıdalanýǵa berilgen.
— Prezıdenttiń saılaýaldy baǵdarlamasynyń bóligi retinde 2029 jylǵa qaraı 111 mıllıon sharshy metr turǵyn úıdi paıdalanýǵa berý josparlanyp otyr, bul 1 mıllıonnan astam azamatty jeke turǵyn úımen qamtamasyz etedi. Bul josparlanǵan kórsetkishten 7,3 mıllıon sharshy metrge artyq, — dedi Qýandyq Qajkenov elordada Kongress ortalyqta ótken eseptik kezdesýde.
Sonymen birge, turǵyn úı sektorynda halyqtyń áleýmettik osal toptaryna jalǵa beriletin turǵyn úı jáne kezekte turǵandarǵa nesıelik turǵyn úı berý sekildi qoldaý sharalary júrgizilip keledi.
— Áleýmettik jaǵynan osal toptarǵa jaldamaly baspana berý maqsatynda 2025 jyldyń alǵashqy 11 aıynyń sońyna deıin 7,2 myń páter satyp alyndy, — atap ótti Qýandyq Qajkenov.
Sondaı-aq, ákimdikter 11 aıda memlekettik baǵaly qaǵazdardy shyǵarý arqyly 4,4 myń páter salyp, satyp aldy. 63,1 mlrd teńge bolatyn 4,9 myń ıpotekalyq nesıe jeńildikpen — 2% jáne 5%-dyq mólsherlememen berildi.
Oǵan qosymsha, 11 aıda «Naýryz» jáne «Naýryz jumysker» ıpotekalyq baǵdarlamalary boıynsha jalpy somasy 205,7 mlrd teńgege 7,6 myń ıpotekalyq nesıe berildi.
— Jańa zańnamalyq túzetýler aıasynda turǵyn úıge muqtaj adamdardy tirkeý men jalǵa beriletin turǵyn úıdi taratý mindeti ákimdikterden Otbasy bankine berilgenin atap ótken jón. Qazirgi ýaqytta 965 myńnan astam azamat tirkelgen, onyń ishinde shamamen 600 myńy áleýmettik jaǵynan osal topqa jatady. Bıyl azamattarǵa shamamen 7,3 myń jalǵa beriletin páter jáne 10 myńnan astam sýbsıdııalanǵan ıpotekalyq nesıe berildi, — dedi vıtse-mınıstr.
Memlekettik qoldaýdyń taǵy bir sharasy — turǵyn úı jaldaý aqysynyń bir bóligin sýbsıdııalaý jáne turǵyn úı sertıfıkattaryn berý. 2025 jyldyń úshinshi toqsanynyń sońyna qaraı 11 myńnan astam azamat osy sýbsıdııalardan paıda kórdi, bul maqsattarǵa respýblıkalyq bıýdjetten 7,6 mlrd teńge bólindi. Sondaı-aq, 11 aıdyń qorytyndysy boıynsha 1400-den astam azamat alǵashqy jarnalaryn jabý úshin jalpy somasy 1,7 mlrd teńgege turǵyn úı sertıfıkattaryn alǵan.
Aıta keteıik, elimizdiń 17 óńirinde turǵyn úıdi paıdalanýǵa berýde oń dınamıka baıqalady.