Áleýmettik optımızm men bolashaqqa senim: Qazaqstan azamattyǵynan shyǵýǵa nıettiler sany 40 ese azaıdy
ASTANA. KAZINFORM — Vıtse-Prezıdent Erlan Qarınniń tóraǵalyǵymen Azamattyq máseleleri jónindegi komıssııanyń kezekti otyrysy ótti. Bul týraly Aqordanyń baspasóz qyzmeti habarlady.
Jıyn qorytyndysy boıynsha Memleket basshysyna 255 adamdy Qazaqstan azamattyǵyna qabyldaý týraly usynys engiziledi.
Sondaı-aq komıssııa 43 adamnyń azamattyqtan bas tartý týraly ótinishin qanaǵattandyrýdy usynbaq.
Vıtse-Prezıdenttiń aıtýynsha, sońǵy jyldary Qazaqstan azamattyǵynan shyǵýǵa nıet bildirýshiler sanynyń azaıý úrdisi saqtalyp otyr.
Atap aıtqanda, keıingi 8 jylda Qazaqstan azamattyǵynan shyǵý týraly ótinishter sany shamamen 40 esege jýyq azaıǵan. Bul óz kezeginde elimizdegi áleýmettik optımızm deńgeıiniń joǵary ekenin kórsetedi.
— Prezıdent Qasym-Jomart Toqaev atap ótkendeı, tólqujatymyzdyń bedeli jyldan jylǵa nyǵaıyp keledi. Bul Qazaqstannyń tartymdylyǵynyń arta túskenin bildiredi. Túrli ındeksterdiń derekterine sáıkes, Qazaqstan tólqujaty óńirde eń tańdaýly sanalady. Azamattarymyz álemniń 80-ge jýyq eline vızasyz qatynaı alady, — dedi Erlan Qarın.
Sonymen qatar Qazaqstan azamattyǵy sheteldiń ІT, bıznes salalarynyń kórnekti ókilderi, ınvestorlar, ǵylymdar men mádenıet qaıratkerleri úshin tartymdy bola túsýde.
— Elimizdiń azamattyǵy Prezıdenttiń áleýmettik-ekonomıkalyq jáne qoǵamdyq-saıası salalarda júzege asyrǵan reformalarynyń nátıjesinde osyndaı bedelge ıe boldy. Sondaı-aq bul Memleket basshysy júrgizip otyrǵan halyqaralyq yntymaqtastyq saıasatynyń jemisi ekeni anyq, — dedi Erlan Qarın.
Osyǵan deıin Erlan Qarın Mereke Qulkenovpen qazaq ádebıetiniń damýyn talqylady.
