Álemde alıýmınıı baǵasy sharyqtady

ASTANA. KAZINFORM — Álem boıynsha alıýmınıı baǵasy sońǵy tórt jyldaǵy eń joǵary kórsetkishke kóterildi, dep habarlaıdy AZERTADJ Investing portalyna silteme jasap.

London metall bırjasynda (LME) saýda barysynda alıýmınıı fıýchersteri 2,8%-ǵa ósken — tonnasy 3544 dollarǵa jetken. Bul kórsetkish sáýir 2022 jyldan beri alǵash ret tirkeldi.

Sodan keıin baǵa azdap tómendedi. Sońǵy málimetter boıynsha alıýmınııdiń tonnasy 3387 dollarǵa, ıaǵnı 1,1%-ǵa arzandaǵan.

Ótken aptada alıýmınıı baǵasy shamamen 10%-ǵa kóterilip, sońǵy úsh jyldyń eń úlken aptalyq ósimin kórsetti. Sarapshylar bul dınamıkany Taıaý Shyǵys elderinen keletin jetkizilimderde múmkin bolatyn úzilisterge baılanysty dep túsindiredi. Bul elder álemdik alıýmınıı óndirisiniń shamamen 9%-yn qamtamasyz etedi.

Sonymen qatar, Qatar men Bahreındegi eki alıýmınıı zaýyty aımaqtaǵy qarýly qaqtyǵysqa baılanysty jetkizilimdi toqtatýǵa májbúr boldy.

Shuohe Asset Management Co. kompanııasynyń sarapshysy Gao In uzaqqa sozylǵan qaqtyǵys alıýmınıı jetkizilimderine teris áser etýi múmkin ekenin atap ótti. Onyń aıtýynsha, tutynýshylar múmkin bolatyn úzilisterge daıyn bolý úshin metall qoryn arttyra bastady.

Buǵan deıin Qazaqstan alıýmınıı dóńgelek dıskilerin óndirýdi qolǵa alatyny habarlandy.