Álem boıynsha balyq aýlaý kólemi azaıady - ǵalymdar
ASTANA. KAZINFORM - Aýstralııadaǵy Monash ýnıversıteti ǵalymdary júrgizgen jańa modeldeý nátıjeleri klımattyń ózgerýi kóptegen óńirlerde balyq aýlaý kólemine qalaı áser etetinin kórsetti.
Bul jaǵdaı azyq-túlik qaýipsizdigine, halyqtyń kúnkóris kózderine jáne teńiz florasy men faýnasynyń turaqty azyq kózi retindegi bolashaǵyna qaýip tóndiredi.
Sheteldik BAQ-qa silteme jasaǵan Azertadj agenttiginiń habarlaýynsha, buǵan deıingi boljamdyq modelder balyq túrleriniń temperatýranyń kóterilýine evolıýtsııalyq ózgeristersiz qalaı jaýap beretinin qarastyrǵan. Al Science jýrnalynda jarııalanǵan jańa zertteýde balyqtardyń bolashaq klımattyq jaǵdaılarǵa beıimdelý barysynda qalaı evolıýtsııalanatyny taldanady.
Balyq sharýashylyǵy mıllıardtaǵan adamdy aqýyzben qamtamasyz etedi, al oǵan degen suranys aldaǵy ýaqytta arta túspek. Alaıda muhıttardyń jylynýy men aýa raıynyń ózgerýi jaǵdaıynda balyqtar evolıýtsııalyq turǵyda ózgerip, olardyń ósimtaldyǵy tómendeýi nemese keıbir túrlerdiń múlde joıylyp ketýi múmkin.
Zertteýshiler jahandyq ózgeristerge baılanysty evolıýtsııalyq beıimdelý balyq sharýashylyǵynyń turaqtylyǵyn álsiretip, álemdik aýlaý kólemine teris áser etetinin anyqtady.
Zertteýdiń jetekshi avtory, jaratylystaný fakýltetiniń bıologııa ǵylymdary mektebiniń meńgerýshisi Kreıg Ýaıttyń aıtýynsha, jahandyq jylyný saldarynan balyqtar tezirek ósip, erterek jetiledi, bul olardyń eń úlkeniniń kóleminiń kishireıýine ákeledi.
- Bul evolıýtsııa balyqtardyń ómirsheńdigi úshin tıimdi bolǵanymen, balyq sharýashylyǵy úshin tıimsiz. Evolıýtsııa jahandyq jylynýdyń balyqtyń tirshilik qabiletine áserin álsiretkenimen, aýlaý kóleminiń turaqtylyǵyna keri yqpalyn kúsheıtedi, — dedi professor.
Osyǵan deıin elimizde 11 aıda balyq ónimderiniń naryǵy 76,8 myń tonnaǵa jetkeni týraly jazdyq.