Aleksandr Býblık Ýımbldon týrnırin jeńispen bastady

NUR-SULTAN. QazAqparat - Qazaqstannyń birinshi, álemniń 38-raketkasy Aleksandr Býblık Ýımbldon týrnırin jeńispen bastady, dep habarlaıdy QazAqparat tilshisi.

«Úlken dýlyǵa» jarysy - Ulybrıtanııa ashyq chempıonatynyń alǵashqy aınalymynda qazaqstandyq tennısshi álemniń 59-raketkasy, majarstandyq Marton Fýchovıchpen sheberlik baıqasty.

A.Býblık 6:1, 6:2, 6:4 esebimen jeńiske jetti.

Saǵat jarymǵa jýyq ýaqytqa sozylǵan matchta qazaqstandyq sportshy 16 eıs jasap, 10 breık-poınttyń teń jartysyn paıdalana bildi.

A.Býblık ekinshi aınalymda álemniń 64-raketkasy, serbııalyq Dýshan Laıovıchpen kúsh synasady.

Búgin sondaı-aq Mıhaıl Kýkýshkın kortqa shyǵady. Onyń qarsylasy - amerıkalyq Djenson Brýksbı.

Eske sala keteıik, budan buryn qazaqstandyq jas tennısshilerdiń Ýımbldon jasóspirimder týrnırinde oınaıtynyn jazǵan bolatynbyz.