Aleksandr Býblık alǵash ret Parıj masters týrnıriniń shırek fınalyna ótti

ASTANA. KAZINFORM — Qazaqstannyń birinshi, álemniń 16-raketkasy Aleksandr Býblık Parıj masters týrnıriniń shırek fınalyna shyqty.

Qazaqstandyq tennısshi úshinshi aınalymda álemniń 4-raketkasy, amerıkalyq Teılor Frıtspen betpe-bet keldi.

Qarsylastar osyǵan deıin alty ret kezdesken, esep teń edi – 3:3. 

Bul joly birinshi partııada taı-breıkte Býblık tabandylyq tanytty – 7:6 (7:5).

Ekinshi sette esep 3:2 bolǵan mezette qazaqstandyq sportshy breık jasap, óz geımin de aldy – 5:2. Sodan keıin matchty ekinshi breıkpen túıindedi – 6:2.

Bir saǵat 26 mınýtqa sozylǵan básekede Býblık 11 eıspen birge 10 breık-poınttyń ekeýin paıdalandy. Frıts 15 eıs jasaǵanymen, 4 breık-poınttan eshteńe shyǵara almady.

Osylaısha, A.Býblık sporttyq jolynda alǵash ret Parıj masters týrnıriniń shırek fınalyna joldama aldy. 

Aleksandr Býblık jartylaı fınalǵa shyǵý úshin álemniń 6-raketkasy, aýstralııalyq Aleks de Mınor nemese reıtıngide 14-oryndaǵy reseılik Karen Hachanovtyń qaı jeńgenimen talasady. 

Qazaqstandyq tennısshi qazirgi kezde ATP Live reıtıngisinde 13-satyǵa kóterilip tur.

Eske sala keteıik, budan buryn Elena Rybakınanyń WTA qorytyndy týrnırindegi qarsylastary anyqtalǵanyn jazǵan bolatynbyz.

Sondaı-aq Parıj masters týrnırinde Aleksandr Býblık úshinshi aınalymǵa shyqty.