Aleksandr Brazevıch «Qyzyljardyń» bas bapkeri qyzmetinen ketti

ASTANA. KAZINFORM — Bul jóninde petropavldyq klýbtyń baspasóz qyzmeti málim etti.

Habarlamada komanda basshylyǵy Aleksandr Brazevıch pen onyń kómekshisi Igor Tarlovskııge atqarǵan eńbegi men komandanyń damýyna qosqan úlesi úshin alǵys bildirgen.

A. Brazevıch komandaǵa bıyl qyzmetke keldi. Qazirge deıin petropavldyq komanda birde-bir márte jeńiske jetken joq. Eki ret teń tússe, ekeýinde qarsylasyna ese jiberdi. Týrnır kestesinde nebári eki upaımen on birinshi orynda tur.

Belorýs mamany buǵan deıin lıtvalyq «Taýras» jáne «Jalgırıs», belorýstik «Dınamo-Brest, «Slýtsk», «Smolevıchı», «Torpedo» komandalaryn jattyqtyrǵan. 

Aıta ketsek, oǵan deıin atalǵan qyzmette bolǵan Álı Álıevpen kelisimshart merziminiń aıaqtalýyna baılanysty klýbtaǵy bapkerlik qyzmetinen ketken bolatyn. 

Eske salsaq, Qazaqstan kýbogynda «Qyzyljar» komandasy «Qaısardy» jeńip, shırek fınalǵa joldama aldy.