Alakóldegi deltaplan apaty: ushqyshtyń kýáligi bolmaǵan
ASTANA. KAZINFORM – Qazaqstannyń avıatsııa ákimshiliginiń basshysy Katalın Radý Alakólde deltaplan apatyna qatysty tergeýdiń qorytyndysyn jarııalady.
Onyń aıtýynsha, keıingi kezde shaǵyn avıatsııa salasynda kóptegen suraq týyndap jatyr. Bul máseleni retteıtin zańnamany sala sýbektileri oryndamaı otyr.
Katalın Radýdyń sózine qaraǵanda, deltaplan ıesi óz ushaǵyn azamattyq áýe kemeleriniń memlekettik tizilimine tirkemegen. Ushaqta jaramdylyq sertıfıkaty bolmaǵan.
«Sonymen birge, ushqyshtyń ushaqty basqarýǵa qatysty tıisti quzyreti belgilenbegen. Atap aıtqanda, onyń ushýǵa ruqsat beretin jaramdy kýáligi bolmaǵan», - dedi ol Kólik mınıstrliginde ótken baspasóz máslıhatynda.
Avıatsııa ákimshiliginiń basshysy shaǵyn avıatsııa salasyndaǵy keıingi oqıǵalar negizinde jyl basynan bastalǵan jospardan tys jáne josparly tekserýler atqarylyp jatqanyn atap ótti.
Eske salsaq, bıyl shilde aıynda Alakólge deltaplan qulap, eki adam aýrýhanaǵa jetkizildi.
