Alakólde jaǵajaı bar da, jaǵdaı joq
ASTANA. KAZINFORM — Eki kún buryn Memleket basshysy Úkimetke tez arada eldegi barlyq týrıstik baǵyttyń jaǵdaıyn rettep, olqylyq jibergen jaýaptylardy jazalaýdy tapsyrdy. Týrıstik ınfraqurylymnyń álsizdigi men qyzmet sapasynyń tómendigi Qazaqstandaǵy týrızm salasynyń eń basty máselesine aınalyp otyr. Atalǵan jaǵdaı ásirese ishki týrızmniń iri núkteleriniń biri sanalatyn Alakólde qatty baıqalady.
— Qazir áleýmettik jelilerdi qarap otyrsańyz, tek Alakól emes, Balqash syndy sý aıdyndaryna da otandastarymyz kóptep baryp jatyr. Biraq demalýshylar tarapynan qonaqúılerge qatysty shaǵym jıi túsedi. Qyzmet sapasy men jaılylyq jetkiliksiz, — deıdi «Kazakh Tourism» ulttyq kompanııasy jobalardy súıemeldeý departamentiniń dırektory Álisher Tursyn Jibek joly arnasynyń «Búgin LIVE» baǵdarlamasyna bergen suhbatynda.
Alakól — elimizdiń ishki týrızmindegi basty baǵyttardyń biri. Degenmen ınfraqurylym men qyzmet sapasy jaǵynan áli de kenje qalyp tur. Kóptegen nysanda aǵylshyn tilin biletin qyzmetkerler joq, bul sheteldik týrıster úshin kedergi.
— Qonaqúılerdiń kóbi qonaqjaı formatynda, ıaǵnı tek qoljetimdi baǵadaǵy qarapaıym qyzmetter usynady. Halyqaralyq deńgeıdegi brendter joqtyń qasy. Qazir biz Taılandtan bir iri qonaqúı jelisin shaqyryp otyrmyz. Olar jergilikti naryqpen tanysyp, franshızalyq model engizý boıynsha usynys beredi. Taıland týrızminiń úlgisin engizý arqyly jaǵajaı týrızmi damyp, sheteldik týrısterdiń qyzyǵýshylyǵyn arttyrý kózdelip otyr, — deıdi spıker.
Búgingi tańda elimizde qonaqúılerge juldyz berý júıesi tek usynymdyq sıpatqa ıe. Bul sapany naqty baqylaýǵa múmkindik bermeıdi.
— Eger zańnamalyq ózgerister qabyldansa, onda qonaqúılerdi júıeli túrde tekserip, olardyń juldyzyn tómendetý ne múlde alyp tastaý quqyǵyna ıe bolar edik. Bul saladaǵy sapany kóterýdiń birden-bir joly, — dedi Álisher Tursyn.
Qazaqstandyqtar ishki týrıstik aımaqtardy jaqsy bilse de, olarǵa jetý joly úlken qıyndyq týdyrady. Ushaqpen jetý úshin bılet tabý qıyn, temirjolda — vagon tapshylyǵy.
— Bıyl bul baǵytta biraz ilgerileý bar. Astana — Úsharal jáne Almaty — Úsharal baǵyttaryna Kólik mınıstrligi tarapynan 6,5 mlrd teńge sýbsıdııa bólindi. Qazir aptasyna 7 reıs turaqty túrde ushady. Temirjol salasynda da oń ózgerister bar. 11 shildeden bastap Astanadan Býrabaıǵa qatynaıtyn jańa «Burabay Express» elektr poıyzy iske qosyldy. Jolaýshylarǵa qolaıly jaǵdaı jasalǵan. Osyndaı poıyzdardy aldaǵy ýaqytta Alakól baǵytyna da qoıýdy josparlap otyrmyz, — deıdi departament dırektory.
Jaz aılarynda qazaqstandyqtar negizinen Alakól, Balqash, Almatynyń taý klasteri, Saıram-Ógem ulttyq parki men Kaspıı teńiziniń jaǵalaýyna jıi barady eken.
— Al sheteldik týrıster Almaty, Astana qalalaryna, sondaı-aq Aqmola men Mańǵystaý oblystaryna kóbirek keledi. Іskerlik týrızm boıynsha Atyraý oblysy jıi tańdalady, — deıdi Álisher Tursyn.
Qazirgi tańda Prezıdent ákimshiligi basshysynyń orynbasary bastaǵan arnaıy komıssııa Alakól óńirinde issaparmen júr. Olar týrıstik baǵyttyń ınfraqurylymyn, kólik qatynasyn, qyzmet kórsetý jaǵdaıyn saraptap jatqan kórinedi.
— Týrızmdi damytýǵa memlekettik deńgeıde kóńil bólinip jatyr. Biraq naqty nátıjege jetý úshin zańnama, qyzmet sapasy men ınfraqurylym qatar damýy kerek, — dep túıindedi stýdııa qonaǵy.
Aıta keteıik, «AMANAT» partııasy jaqynda taý týrızmin damytý jobasyn iske qosty.
Odan bólek, Týrızm jáne sport mınıstrligi 2026 jyldan bastap uıaly derekter negizinde tsıfrlyq statıstıkaǵa kóshpek.