Alakólde ruqsatsyz ushqan deltaplan tárkilendi

  TALDYQORǴAN. KAZINFORM - Ótken jyly  Alakólde qulaǵan deltaplan ıesine aıyppul salynyp, jeńil ushaq tárkilendi.

Bas kólik prokýratýrasynyń málimetinshe, «Dostyq» kólik prokýratýrasy «SKYPPER 912» deltaplan ıesiniń zań buzýshylyqtar jasaǵanyn anyqtaǵan. Ol tıisti ruqsatsyz demalýshylarǵa Alakól ústinde aqyly ushýdy usynǵan. Atalǵan tehnıka ótken jyly kólge qulap, saldarynan eki adam jaraqat aldy. QR QK - niń 344-babynyń 1-bóligi boıynsha qylmystyq is taraptardyń tatýlasýyna baılanysty toqtatylǵan edi.

Prokýratýranyń bastamasymen Almaty qalasynyń ákimshilik quqyq buzýshylyqtar boıynsha mamandandyrylǵan aýdanaralyq sotynda kásipkerdi ákimshilik jaýaptylyqqa tartý máselesi qaraldy.

- Sot deltaplan ıesin Qazaqstan Respýblıkasynyń áýe keńistigin paıdalaný tártibin buzǵany úshin Ákimshilik quqyq buzýshylyqtar týraly kodekstiń 563-babynyń 2-bóligimen kináli dep tapty. Oǵan 55 380 teńge aıyppul salynyp, ushý apparaty memleket paıdasyna tárkilendi, - dedi Bas kólik prokýratýrasy.

Eske salaıyq osyǵan deıin Alakólge deltaplan qulap, eki adamnyń aýrýhanaǵa jetkizilgenin jazǵanbyz.