Google neırojeli arqyly tikeleı qujat generatsııalaý fýnktsııasyn iske qosty
ASTANA. KAZINFORM — Google kompanııasy Gemini atty jasandy ıntellekt qyzmetiniń múmkindikterin keńeıtip, chat ishinde tikeleı qujat generatsııalaý fýnktsııasyn iske qosty. Kompanııa blogynda habarlanǵandaı, jańa múmkindik barlyq qoldanýshylarǵa shekteýsiz qoljetimdi, dep jazdy 24kg.
Qyzmet túrli formattaǵy qujattardy jasaýǵa múmkindik beredi: PDF, DOCX, XLSX, CSV, sondaı-aq olardy Google Drive-qa eksporttaýǵa bolady. Sonymen qatar LaTeX, TXT, RTF, Markdown formattary jáne Google Docs, kesteler men prezentatsııalardyń ishki faıldary da qoldaý tabady.
Jańa fýnktsııa ónimdilikti arttyrýǵa baǵyttalǵan. Paıdalanýshylar júktelgen derekter men mátindik suranystar negizinde qurylymdalǵan materıaldar jasaı alady. Mysaly, kompanııa kórsetken demonstratsııada konspekt sýretteri negizinde grafıkter, vızýaldy elementter men matematıkalyq formýlalardy qamtıtyn tolyqqandy PDF oqý quraly jasalǵan.
Google Gemini — 2023 jyly Google DeepMind ázirlegen jasandy ıntellektke negizdelgen chat-bot. Alǵashynda Bard dep atalǵan bul servıs 2024 jyldyń aqpanynda Gemini ataýyna ózgertildi.
Buǵan deıin Eýropalyq komıssııa Google kompanııasyna izdeý júıesine qatysty derekterdi úshinshi taraptarǵa berýdi usynǵan bolatyn. Komıssııa málimetinshe, bul sharalar Eýropalyq odaqtyń Digital Markets Act (DMA) talaptaryna sáıkestikti qamtamasyz etýge baǵyttalǵan.
