Alakól mańyndaǵy áýejaı jóndeýden ótýde

ÓSKEMEN. QazAqparat – Shyǵys Qazaqstan oblysy Úrjar aýdanyndaǵy áýejaıda rekonstrýktsııalaý jumystary jazǵa deıin aıaqtalady dep kútilýde, dep habarlaıdy QazAqparat tilshisi.

Aımaq basshysy Danıal Ahmetov Alakólge jaqyn ornalasqan Úrjar aýylyndaǵy áýejaıda júrgizilip jatqan rekonstrýktsııalaý jumystary boıynsha jınalys ótkizdi.

«Bul joba «Jumyspen qamtýdyń jol kartasy» baǵdarlamasy aıasynda júzege asyrylýda. Úrjar aýdanynda Shyǵys Qazaqstannyń injý-marjany sanalatyn – Alakól bar. Sondyqtan týrıstik maýsymnyń basynda áýejaıdyń týrısterdi qabyldaı alýy óte mańyzdy. Bul osy salany damytýdaǵy úlken qadam. Qazir basty kezeńderdiń biri – ushaqtardy túngi ýaqytta qabyldaýǵa múmkindik beretin zamanaýı jaryq-dabyl jabdyǵyn ornatý jumystary júrgizilýde», - dedi oblys ákimi.

Óz sózinde ol saraptamalyq kompanııalardy shaqyrýdy tapsyrdy. Olar qondyrǵynyń durys jáne aýytqýsyz jasalǵanyna kóz jetkizýi shart.

«Ushý-qoný jolaǵyndaǵy jumystar aıaqtalýǵa jaqyn. Nátıjesinde, onyń eni 35 metrge, al uzyndyǵy 2,7 shaqyrymǵa deıin ulǵaıdy. Qaıta jańǵyrtýdan keıin Úrjar aýylynyń áýejaıy shaǵyn avıatsııanyń ǵana emes, Embraer, Bombardier klasty jáne basqa da ushaqtardy qabyldaı alady. Bul Alakól jaǵalaýyndaǵy týrıster aǵynyn arttyrýǵa múmkindik beredi», - dedi Danıal Ahmetov.