Alakól aýdanynda taksıden 11 mln teńge urlaǵan kúdikti ustaldy

TALDYQORǴAN. KAZINFORM — Alakól aýdanynyń Úsharal qalasynda iri kólemde aqsha urlaý deregi tirkeldi. Qazirgi ýaqytta kúdikti qamaýǵa alynyp, sotqa deıingi tergeý bastaldy.

Jetisý oblystyq polıtsııa departamentiniń málimetinshe, oqıǵa 11- qańtar kúni bolǵan. 

11 mıllıon teńgege kóligin satqan er adam aqshany paketke salyp, ony «Mersedes» markaly avtokóliginiń júksalǵyshyna qoıǵan. Keshke ol tanysymen meıramhanaǵa baryp, shyqqan soń sol mańda taksı izdep turǵan 2 jolaýshyny kelesi bir dámhanaǵa jetkizbek bolady. Jolda patrýldik polıtsııa qyzmetkerleri toqtatyp, júrgizýshi 10 mınýttaı bógelip qalǵan. Osy aralyqta júksalǵyshtaǵy aqshany jolaýshylardyń biri urlap, qashyp ketken.

— Er adam júksalǵyshty ashyp aqshasyn teksergen kezde, birneshe kýpıýra jerge shashylyp, sol mańda turǵan jastardyń nazaryn aýdarǵan. Olardyń «Aqsha ma?» degen suraǵyna «Iá» dep jaýap berip, esh kúdiktenbesten aıtqan jerlerine jetkizip salý úshin kóligine otyrǵyzǵan. Aqsha joǵalǵan soń júrgizýshi Alakól aýdanynyń polıtsııa bólimine aryzdandy. Polıtseıler jedel áreket etip, izdestirý is-sharalaryn uıymdastyrdy. Kóp uzamaı kúdikti ustaldy. Ol 24 jastaǵy jergilikti turǵyn bolyp shyqty, — dedi Jetisý oblystyq polıtsııa departamenti.

Qazirgi ýaqytta bul fakti boıynsha sotqa deıingi tergeý bastaldy, kúdikti qamaýǵa alyndy.

Oqıǵanyń barlyq mán-jaıy anyqtalýda.

Eske salaıyq osyǵan deıin Jetisý oblysynda kólik urlap, izin sýytqan 33 jastaǵy er adamnyń ustalǵanyn jazǵanbyz.