Al Jazeera – Prezıdent Teleradıokesheniniń jańa seriktesi
DOHA.KAZINFORM – Búgin Qazaqstan Respýblıkasynyń Prezıdenti Qasym-Jomart Toqaev Qatarǵa memlekettik sapary aıasynda Prezıdent Teleradıokesheni Qatar medıa salasynyń kóshbasshylarymen yntymaqtastyq týraly memorandýmdarǵa qol qoıdy.
Al Jazeera jáne «Qatar News Agency» aqparat agenttigi Prezıdent teleradıokesheniniń seriktesteri boldy.
Arabtyń medıa keńistiginde tanymal kóshbasshy jáne álemdik bedeldi BAQ-tyń biri «Al Jazeera» halyqaralyq telearnasymen jáne «Qatar News Agency» agenttigimen yntymaqtastyq kásibı tájirıbe almasýǵa jáne jahandyq aqparat keńistiginde Qazaqstan týraly aqparat kóleminiń ósýine yqpal etedi.
TRK-nyń katarlyq áriptesterimen birlesken jobalary oqyrmandar men telekórermenderge bizdiń elderimiz týraly kóbirek bilýge múmkindik beretin, sondaı-aq tilshilerdi Qazaqstan medıa salasynyń betalystary men trendterine sáıkes daıyndaýdy qamtamasyz etetin bilim berý jáne aqparattyq salalarǵa baǵyttalǵan.
Prezıdent TRK dırektory Raýshan Qajybaevanyń aıtýynsha, «taraptar birqatar birlesken jobalardy, sonyń ishinde «Al Jazeera-men aptalyq» ótkizýdi josparlaǵan, onyń aıasynda Astana qalasyndaǵy Maqsut Narikbayev University halyqaralyq jýrnalıstıka mektebiniń 100-den astam stýdenti úshin bir aptalyq trenıng ótedi.
2024 jylǵy 14 aqpanda QR Prezıdentiniń Teleradıokesheniniń delegatsııasynyń Al Jazeera Media Network atqarýshy dırektory Ramzan Alnoımı men Al Jazeera Media Institute dırektorynyń orynbasary Montaser Maraımen kezdesýi ótti. «Al Jazeera-men aptalyq» jobasy Al Jazeera Media Institute jelisi arqyly úılestiriledi.
Memorandýmdarǵa qol qoıý eki el arasyndaǵy yntymaqtastyq rýhyna sáıkes keletin keń aýqymdy ekijaqty ózara is-qımylǵa jol ashyp, Qazaqstan men Qatar BAQ arasyndaǵy kásibı dıalogty nyǵaıtýǵa kómektesedi.
QR Prezıdentiniń teleradıokesheni – Qazaqstandaǵy eń iri medıa-kompanııalardyń biri, onyń quramyna: Jibek Joly, Silk Way, Silk Way Cinema telearnalary, Qazaqstandaǵy eń kóne halyqaralyq aqparat agenttigi «Kazinform» jáne Derekti kıno ortalyǵy kiredi.
«Al Jazeera» — 1996 jyly Qatar ámiriniń buıryǵymen qurylǵan halyqaralyq telekompanııa. Telekompanııa álemniń kóptegen elderinde arab jáne aǵylshyn tilderinde habar taratady, onyń 50-den astam sheteldik bıýrosy bar. Derekti kontent Al Jazeera Documentary telearnasynan kórsetiledi.
Qatar News Agency — 1975 jyly qurylǵan memlekttik aqparat agenttigi. Agenttik materıaldary arab, aǵylshyn, ıspan, nemis jáne frantsýz tilderinde qoljetimdi.
