Aqtóbeniń eki aýdanynda daǵdarys ortalyǵy ashyldy

AQTÓBE. KazAqparat - Aqtóbeniń Alǵa jáne Muǵaljar aýdandarynda daǵdarys ortalyǵy ashyldy. Munda kúıeýinen zábir kórgen áıelder men balalar ornalastyrylady, dep habarlaıdy QazAqparat tilshisi.

Otbasylyq janjaldan, erinen zábir kórgen áıelder endi arnaıy ortalyqqa ornalastyrylady.

Mundaı ortalyq tek oblys ortalyǵynda bolsa, qazir aýdandarda da bar.

«Áıelder men balalarǵa qamqorlyq jasaý – elimizdiń memlekettik saıasatynyń ajyramas bóligi. Memleket basshysy otbasylyq-turmystyq zorlyq-zombylyq problemalaryna erekshe nazar aýdaryp, onyń qurbandaryn qoldaý jóninde pármendi sharalar qabyldaýdy tapsyrdy. Osy tapsyrmany iske asyrý maqsatynda jergilikti atqarýshy organdardyń qoldaýymen Alǵa jáne Qandyaǵash qalalarynda kómek kórsetý daǵdarys ortalyǵy ashyldy. Ortalyqtyń ashylýynda oblystyq PD bastyǵy Abaı Júsipov qazirgi ýaqytta Aqtóbe qalasynda eki daǵdarys ortalyǵy jumys isteıtinin, onda polıtsııa qyzmetkerleri osy baǵdarlama sheńberinde jynystyq jáne turmystyq zorlyq-zombylyq qurbandarynyń qatysýymen tergeý áreketterin júrgizetinin, sondaı-aq psıhologııalyq jáne medıtsınalyq kómek kórsetetinin habarlady. Ortalyqtar Hromtaý jáne Shalqar aýdandarynda da ashylady», - dep habarlady oblystyq PD baspasóz qyzmetiniń jetekshisi.

Eske salsaq, bıylǵy 9 aıda kúıeýinen zábir kórgen 100 myńnan astam áıel polıtsııaǵa qońyraý shaldy.

Bul týraly QR Іshki ister mınıstri Marat Ahmetjanov Shyǵys Qazaqstan oblysynyń turǵyndarymen eseptik kezdesýde aıtty.

Polıtsııa qyzmetkerleri birden oqıǵa oryndaryna bardy. Alaıda áıelderdiń 62 paıyzy jubaıynyń ústinen aryz jazýdan bas tartqan.