Aqtóbelik oqýshylar «Robot-laborant» oılap tapty
AQTÓBE. KAZINFORM — Oqý-aǵartý mınıstrliginiń baspasóz qyzmeti «100 jańa esim – 100 novyh lıts» aıdaryn jalǵastyryp otyr. Aqtóbe oblysy Shalqar qalasyndaǵy №3 orta mektebiniń 9-synyp oqýshylary Arsen Sısenbaı men Aıdarbek Mıras jasaǵan «Robot-laborant» jobasyn tanystyrdy.
Jas ónertapqyshtar qurylǵyny C++ baǵdarlamalaý tilin jáne Arduino mıkrokontrollerin qoldana otyryp, jasady. Robotty smartfon arqyly basqarý úshin RemoteXY platformasyn paıdalanǵan, al shemalar Tinkercad kómegimen jasaldy.
«Robot-laborant» oqý protsesine kómektesip júr: robototehnıka sabaqtary úshin qandaı bólshekter qajet ekenin aıtady, sonymen qatar qaýipsizdik erejelerin eskertedi. Bul qurylǵy fızıka men ınformatıka sabaqtarynda zerthanalyq jáne praktıkalyq jumystardy júrgizýdi jeńildetip, oqý úderisin kórneki ári tıimdi etedi.
— Synyptastarymyz robototehnıka men baǵdarlamalaýǵa kóp qyzyǵýshylyq tanyta bastady. Bul robot muǵalimderge zerthanalyq jumystardy uıymdastyrýdy jeńildetedi jáne oqýshylardyń óz betinshe jumys isteý daǵdylaryn arttyrady, ınjenerlik mamandyqtarǵa degen qyzyǵýshylyqty kúsheıtedi, — deıdi joba avtorlary.
Jas ónertapqyshtar jobany ári qaraı jetildirip, bolashaqta oqý úderisin avtomattandyrýǵa úles qossaq deıdi.
Aıta ketelik SQO-da 7-synyp oqýshysy shahmat trenajerin jasap shyqqan edi.
