Aqtóbelik ájeler umyt qalǵan ánderdi qaıta jańǵyrtty
AQTÓBE. KAZINFORM – Muǵalim men medbıke, áskerı qyzmetshi men tárbıeshi ansambl quryp, qazaqtyń umyt bola bastaǵan ánderin qaıta jańǵyrtty. Akapellada án salatyn «Asyl ájeler» óńirde de, elimizde de baıqaýda únemi jeńimpaz atanady. Kazinform tilshisi ájelerdiń repertýarymen tanysyp, ánin tyńdady.
80 jastan asqan shaǵymda án shyrqap júrmin – Gúlara Shalabaeva
«Asyl ájeler» ansambli múshesiniń eń úlkeni 80-de. Gúlara Shalabaeva 1945 jyldyń kúzinde ómirge kelgen. Aqtóbe óńirinde bilim aldy. Keıin munaı barlaý salasynda eńbek etip, 13 qursaq kóterdi. «Altyn alqa» ıegeri nemere-shóbere qyzyǵyn kórip otyr. Zeınetker osydan 17 jyl buryn ansambl qurylatynyn estip, ózin shaqyrǵan soń keledi.
– Ózim án aıtýǵa yntaly boldym. Armanyma jettim dep oılaımyn. Balalarym da ruqsat berdi. Munda kelgenimen 17 jyl tolady. Ózim ánniń sózin bir saǵatta jattap alamyn. Bizdi «bir núktege qarap tursań sózi oıǵa orala ketedi» dep úıretti. Sahnaǵa shyqqan soń shynymen de eske túsedi. Jetekshimiz notany da úıretip, tárbıelep jatyr. Shámshi ánderi unaıdy. Ansambl sahnaǵa únemi jańa ándi daıyndap, usynady. Eki apta, bir aı daıyndyq júrgizsek de jańa án shyrqalady, - dedi Gúlara Shalabaeva.
Qarııa mádenıet úıiniń janynda turady ári daıyndyqtan qalmaıdy. Jaýapkershiligi joǵary ári otbasylyq basqosýda án shyrqaǵandy unatady.
– Meni «bıshi áje» dep qarsy alady. Onyń ózi keremet, - dedi ol.
Án aıtý júrekti tazartady – ansambl jetekshisi
Bıbigúl Seıitova 8 jyldan beri «Asyl ájeler» án ansambliniń jetekshisi. Ansambldiń 26 múshesi bar. Báriniń bir armany oryndaldy. Olar bala shaǵynda, jas kúninde sahnaǵa shyǵyp, án aıtqysy keldi. Armany zeınetke shyqqan soń oryndaldy.
– Qoldan kelgenshe kópten aıtylmaı júrgen ándi, onyń ishinde qytaı qazaqtarynyń ánderin alamyz. Qytaı qazaqtary umyt bola bastaǵan ánderdi shyrqap, jańǵyrtyp otyrady. Halyq ánderi de repertýarymyzda bar. Ahmet Jubanovtyń «Aqsholpan» ánin daıyndaýǵa alty aı ýaqyt ketti. Sonymen birge Shámshi Qaldaıaqovtyń 1959 jyly shyqqan «Aısha qyz» áni qaıta shyrqaldy. Ájelerimizdiń «ánshi bolamyn» degen armany oryndalmaǵan kezinde. Maǵan daýysy jaqsy, mýzykany túsinetin, sezetini keldi. Ansambldiń deńgeıi sondyqtan joǵary, - dedi Bıbigúl Seıitova.
«Asyl ájeler» án ansambli jyl saıyn esep berý kontsertin ótkizedi. Bıyl Jumysshy mamandyqtary jyly aıasynda repertýaryn daıyndap, kórermenge usyndy.
– Ájelerimiz túrli salada eńbek etti. Áskerı qyzmetshi, ustaz, balabaqsha meńgerýshisi bolǵan. Ustazdarymyz ónerge jaqyn eken. Bir ereksheligi – akapella. Mýzykalyq aspap súıemeldemeıdi, úsh daýysta án shyrqaıdy. Kásibı mamandardyń aıtýynsha, bul óte qıyn jáne olar bir-birin tyńdaı bilýi tıis. Ájelerimiz úlken deńgeıde án shyrqap júr. Ortamyzǵa jańa qosylǵany ábden úıreniskenshe baqylap júremin. Keıin ǵana baǵyttaımyn, - dedi ol.
Júrekke jetetin ándi tabý úshin ınternetke júginedi. Ári áriptesterine, mýzyka salasynda bilim alyp, ustazdyq etip júrgen dostarynyń kómegine júginedi.
– Kórkem ónerpazdardyń úsh-tórt daýysta án aıtýynyń ózi erekshelik. Akapella aıtý da erekshelik. Bul sırek kezdesedi. Sol úshin de ájelerge alǵys aıtamyn. Aptasyna eki ret eki saǵattan daıyndyq ótkizemiz. Sonymen birge úı tapsyrmasyn beremin. Ortaq chatta otyramyz. Ekinshi daýysty, úshinshi daýysty oryndap jiberip, daıyndyqty pysyqtaýyn suraımyn. Án aıtý júrekti tazartady, ókpeni tazartady, - dedi jetekshisi B.Seıitova.
Ansambl 2008 jyly quryldy. Qazaqsha án shyrqaıtyn ansambldi «Geolog» mádenıet úıiniń dırektory Aıgúl Qaldybaeva uıymdastyrdy. Ájelerdi jınap, sahnaǵa shyǵardy. Alǵashqy jetekshisi – Qarakóz Saǵynova.
– Ájelerimizden sharshadym degen sózdi estimeımiz. Bárin ózim úlgi tutamyn. Daıyndyqty asyǵa kútip júremiz. Daıyndyq biz úshin demalyspen teń, - dedi ansambl múshesi.
Ansambl músheleri ýdmýrt, orys, tatar tilderinde de án shyrqady. Kóbine qazaqtyń eski ánderin jańǵyrtyp, kórermen kóshemetine bólenip júr. Bir kezderi Reseıge de baryp, konkýrstyń jeńimpazy atandy. Al Aqtóbede men el ishinde tek bas júlde men birinshi oryndy ıelenedi.