Aqtóbedegi órt kezinde 44 adam evakýatsııalandy

AQTÓBE. QazAqparat - Búgin saǵat 13:22-de 101 pýltine Aqtóbe qalasynyń Jamanqulov kóshesindegi bes qabatty turǵyn úılerdiń birinde órt shyqqany týraly shaqyrý tústi. Birinshi qabattaǵy páterde úı zattary órtengen, dep habarlaıdy QazAqparat.

Shaqyrý ornyna kelgen órt sóndirýshiler jalyndy sóndirýge jáne turǵyndardy evakýatsııalaýǵa kiristi.

«Barlaý júrgizý kezinde órt sóndirýshilerdiń jedel áreketteriniń arqasynda 4 adam qutqaryldy. Sonymen qatar baspaldaq marshy arqyly 40 adam, onyń ishinde 10 bala evakýatsııalandy.

Órt saǵat 13.47-de sóndirildi. Órt alańy 20 sharshy metrdi qurady. Zardap shekkender joq, órttiń sebebi anyqtalýda», - dep jazdy TJM-nan.

Órtti sóndirýge Aqtóbe oblysy TJ departamentiniń 26 órt sóndirýshisi men 6 tehnıkasy jumyldyryldy. Sondaı-aq, órt ornyna Apattar medıtsınasy ortalyǵy fılıalynyń brıgadasy bardy.

Aqtóbe oblysy TJD azamattardy órt qaýipsizdigi erejelerin saqtaýǵa shaqyrady.