Aqtóbede turatyn alty myńnan astam sheteldik tekserildi
AQTÓBE. KAZINFORM – Olardyń keıbiri turǵylyqty mekenjaıyn aýystyrǵan, qujattarynyń merzimi ótip ketken. Sondaı-aq sheteldikterdi zańsyz tirkeýge qoıǵan páter ıeleri de jaýapqa tartyldy.
Aqtóbede polıtsııa qyzmetkerleri óńirde turaqty turatyn 6 myńnan astam sheteldikti tekserdi. Tirkeý kezinde kórsetken mekenjaıǵa baryp, qujattaryn qarady.
- Keıbir shetel azamattary naqty tirkelgen mekenjaıynda turmaıtyn bolyp shyqty. Bir bóligi uzaq ýaqyt Qazaqstannan tys jerde turǵan. Keıbiri ózge óńirlerge qonys aýdarǵan, bul derekterin ýaqytyly jańartpaǵan. Qazirgi ýaqytta buzýshylyqqa jol bergen adamdardyń elde turaqty turý ruqsat qujatynyń kúshin joıý jumystary júrgizilip jatyr. Sonymen qatar, tirkeý mekenjaıynda turmaıtyn shetel azamattarynyń naqty ornalasqan jeri anyqtalady,- dedi Aqtóbe oblystyq PD baspasóz qyzmeti.
Aqtóbede keıbir páter ıeleri sheteldikterdi óz úıine tirkeýge ruqsat bergen. Barlyǵy 6 páter ıesi ákimshilik jaýapqa tartyldy. Sonymen birge tólqujatynyń merzimi ótip ketken 27 sheteldik jaýapqa tartylyp, 10 AEK kóleminde aıyppul salyndy.
Aıta keteıik, Almatyda kóshi-qon zańyn buzǵan 35 sheteldik elden shyǵaryldy. Barlyǵy 134 adam ákimshilik jaýapqa tartyldy.