Aqtóbede Prezıdenttik shyrsha ótti
ASTANA. KAZINFORM – Aqtóbede «Qosh keldiń, Jańa jyl!» atty balalar shyrshasy ótti. Dástúrli Prezıdenttik shyrshaǵa 180 jas aqtóbelik shaqyryldy.
Bul – kópbalaly jáne az qamtylǵan otbasylardan shyqqan, jetim jáne ata-anasynyń qamqorlyǵynsyz qalǵan balalar, erekshe bilim berý qajettilikteri bar balalar, sondaı-aq oqýda jáne sportta jetistikterge jetken balalar.
Mereke jarqyn tústerge toly teatrlandyrylǵan qoıylymnan bastaldy, onda balalar ertegiler men mýltfılmderdiń súıikti keıipkerlerimen, Aıaz Ata men Aqshaqarmen kezdesti. Sıqyrly atmosfera men jańajyldyq dekoratsııalar qatysýshylarǵa umytylmas sátter syılady.
Oblys ákimi Ashat Shaharov balalardy kele jatqan Jańa jyl merekesimen quttyqtady.
«Qurmetti balalar! Meniń senderge artar úmitim zor jáne erteńgi kúni oblysymyz ben memleketimizdiń atyn shyǵaratyn, elge tanytatyn azamattar bolasyńdar dep senemin.
Bilim men eńbek senderdi bıik belesterge bastaıdy. Bolashaqta ata-ana, ustaz eńbegin aqtap, halyq maqtanyshyna aınalatyn sanaly urpaq, zerdeli de zerek, bilimdi de bilikti bolyńdar, úlkendi syılańdar, Otanymyzdy maqtan tutyńdar, sonda bizdiń elimiz úlken jetistikterge jetedi.
Atanyń ǵana emes, adamnyń balasy, eldiń balasy bolyńdar. Árqashan bıik belesterdi baǵyndyra berińder», - dep óńir basshysy tilegin jetkizdi.
Merekelik sharany uıymdastyrýshylar túrli baıqaýlar, áýezdi ánder jáne bılerimen oıyn-saýyq baǵdarlamasyn ázirledi. Balalar oıyndarǵa belsendi qatysyp, mereke týraly óz áserlerimen qýana bólisti. Ár balaǵa syılyqtar tabystaldy.