Aqtóbede oqýshylarǵa arnalǵan áskerı ınstıtýt bazasyndaǵy qosymsha sabaqtar bastaldy
AQTÓBE. KAZINFORM – Ǵaryshkerler kúnine oraı Aqtóbede mektep pen áskerı ınstıtýt arasyndaǵy yntymaqtastyqty nyǵaıtýǵa baǵyttalǵan mańyzdy joba iske qosyldy. Bul týraly Qorǵanys mınıstrliginiń baspasóz qyzmeti habarlady.
Joba aıasynda № 83 orta mektep, oblystyq planetarıı jáne Áýe qorǵanysy kúshteriniń áskerı ınstıtýty arasynda tájirıbelik baǵyttaǵy memorandýmǵa qol qoıyldy.
Bul qujat oqýshylardyń ǵylymǵa qyzyǵýshylyǵyn arttyrýmen qatar, erte kásibı baǵdar berýdi maqsat etedi. Oqýshylar astronomııa, fızıka jáne geografııa pánderi boıynsha qosymsha sabaqtarǵa qatysyp, mamandardyń qoldaýymen ǵylymı jobalarmen aınalysa alady.
Teorııalyq dárister Áýe qorǵanysy kúshteriniń áskerı ınstıtýty bazasynda ótedi jáne tájirıbemen tolyqtyrylady. Yntymaqtastyq aıasynda ǵylymı konferentsııalar, olımpıadalar men taqyryptyq kezdesýler uıymdastyrylmaq. Áleýmettik turǵydan osal toptaǵy oqýshylarǵa erekshe nazar aýdarylady.
Jobanyń bir bóligi retinde «Ǵarysh buryshy» ashyldy. Bul ortalyqta Qazaqstannyń kosmonavtıka tarıhy tanystyrylady. Іs-sharaǵa oqýshylar, «Jas saqshy» synybynyń tárbıelenýshileri jáne jas ushqyshtar mektebiniń shákirtteri qatysty.
Áskerı ınstıtýttyń bastyǵynyń orynbasary, polkovnık Maqsat Ýáıis bastamanyń tájirıbelik mańyzdylyǵyn atap ótti. Onyń aıtýynsha, balalarǵa bilimdi túsinikti túrde jetkizý jáne olardy mamandyqqa qyzyqtyrý – basty mindet. Naqty áskerı ortada oqytý oqýshylardyń mamandyq tańdaýda sanaly sheshim qabyldaýyna jáne áskerı ushqysh bolýǵa kómektesedi.
Instıtýt janyndaǵy jas ushqyshtar mektebi – daıyndyq júıesiniń mańyzdy bóligi. Bıyl mektepke 57 jyl tolyp otyr. Osy ýaqyt ishinde ol áskerı-patrıottyq klýb retinde aspandy mamandyq retinde tańdaǵan jastar úshin bastaý alańyna aınaldy. Qazirgi ýaqytta tárbıelenýshiler aerodınamıka, navıgatsııa, meteorologııa jáne áskerı pánderdi meńgerip, bolashaq qyzmet pen oqýǵa qajetti bilim alady.
Jas ushqyshtar mektebiniń túlekteriniń 40%-y Áýe qorǵanysy kúshteriniń áskerı ınstıtýtynda bilimin jalǵastyryp, armandaryn júzege asyrýda.
Osylaısha, Aqtóbede mektepten bastap kásibı mamandyq tańdaý kezeńine deıin úzdiksiz bilim berý júıesi qurylýda. Bul joba balalardyń bolashaǵyna senimdilik syılaýmen qatar, aspanǵa alǵashqy qadam jasaýǵa múmkindik beredi.
Aıta keteıik, buǵan deıin áskerı daıyndyq pániniń ataýy ózgerip, mazmuny jańaratynyn habarlaǵanbyz.
