Aqtóbede oqýshy ólimine qatysty is sotqa tústi

AQTÓBE. KAZINFORM – Temir aýdany Qopa aýylyndaǵy 9-synyp oqýshysy Nurjan Sydyqtyń ólimine qatysty is sotqa tústi. Bul týraly oblys prokýratýrasy habarlady.

Aqtóbe oblysy Temir aýdany Qopa aýylynda bolǵan qylmystyq oqıǵadan keıin tergeý 6 aıǵa sozylyp, aıaqtaldy. Prokýratýra isti sotqa jibergenin búgin habarlady.

- Іsti oblystyq polıtsııa departamenti tergep, protsestik prokýror taǵaıyndaldy. Ol tolyq, jan-jaqty jáne obektıvti tergeýdi qamtamasyz etti.
Anyqtalǵany ótken jyldyń 2 qyrkúıeginde Temir aýdanynyń Qopa aýylynda 10-synyp oqýshylary 11-synyp oqýshylarynyń nusqaýymen 9-synyp oqýshylaryn «tárbıelik maqsatta» uryp-soqqan. Saldarynan kámeletke tolmaǵan Nujan Sydyq aýyr dene jaraqattarynan kóz jumdy. Tergeý barysynda 6 kámeletke tolmaǵan kúdikti qamaýǵa alyndy. Olardyń bireýiniń isi Qylmystyq kodekstiń «Abaısyzda jábirlenýshiniń ólimine ákelgen qasaqana aýyr dene jaraqatyn keltirý» baby boıynsha sotqa berildi. Al qalǵan beseýi Qylmystyq kodekstiń «Buzaqylyq» jáne 106-baby 3-bóliginde kózdelgen qylmysty jasaýdy uıymdastyrǵany (Qylmystyq kodekstiń 28-baby 3-bóligi) úshin jaýapqa tartylyp otyr. Sotta memlekettik aıyptaýdy protsess prokýrory qoldaıdy, - dep habarlady Aqtóbe oblysy prokýrorynyń kómekshisi Órken Eşanov.

Aqtóbe oblystyq soty baspasóz qyzmetiniń habarlaýynsha, is sotqa tústi. Ázirge sot aldy tyńdaýy bolatyn kún anyqtalmady. 

Eske salsaq, byltyr Aqtóbeniń Qopa aýylynda janjaldan soń oqýshy kóz jumǵan edi.  Bala quqyqtary jónindegi ýákil Dınara Zakıeva Aqtóbe oblysy Qopa aýylyna baryp, mektepte saýalnama júrgizip, álemjettik bar ekenin anyqtaǵan edi.  Qylmystyq isti tergeý kezinde eki ret baby aýystyryldy. Qańtarda tergeý aıaqtalyp, is tanysý úshin taraptarǵa berilgen edi.