Aqtóbede mektep oqýshysy sýıtsıd jasady

AQTÓBE. KAZINFORM — Shalqar aýdany Toǵyz orta mektebiniń oqýshysy óz-ózine qol jumsady. Qazirgi kezde polıtsııa is qozǵap, tergeý júrip jatyr.

Школа школьники Мектеп оқушылар
Фото: Әділет Беремқұлов/Kazinform

Oqıǵa 17 qańtar kúni oqýshynyń óz úıinde boldy. Shalqar aýdandyq bilim bóliminiń basshysy Aıanbergen Bashanovtyń aıtýynsha, sol kúni oqýshy ózin jaısyz sezinip, sabaqqa barmaǵan. Al keshkilik mal jaılap, anasy sıyr saýyp, ishke kirip ketedi. Keshki as ázirlep, kútkenimen bala kelmeı, anasy artynan barady. Sol kezde sýıtsıd jasaǵanyn kóredi.

— 10-synyp oqýshysy tolyq otbasynda tárbıelendi. Ákesi temirjolda jumys isteıdi, anasy mektepte muǵalim. Hat anyqtalmady. Oqýshy belsendi bolǵan, sportpen shuǵyldanǵan. Ony ata-analary da, aýyl turǵyndary da aıtyp tur. Bul eshqandaı da býllıng emes, — dedi Aıanbergen Bashanov.

Aqtóbe oblystyq PD baspasóz qyzmetiniń jetekshisi Erbolat Sarqulovtyń aıtýynsha, kámelet jasqa tolmaǵan balanyń ólimine qatysty qylmystyq is qozǵalyp, tergeý júrip jatyr. Polıtsııa da býllıng anyqtalmaǵanyn aıtyp otyr. Degenmen «JAN AHUAL» psıhologııalyq qoldaý ortalyǵy arnaıy jospar quryp, túrli kezdesý ótkizdi.

— Toǵyz orta mektebiniń 8-11 klass bilim alýshylaryna, ata-analar men pedagogterine «JAN AHUAL» psıhologııalyq qoldaý ortalyǵy josparly túrde ádistemelik-psıhologııalyq terapııalyq jumystaryn júrgizip jatyr. Pedagog-psıhologqa ádistemelik kómek kórsetildi. Árbir oqýshymen jeke áńgimelesý jáne suhbattasý uıymdastyryldy, ata-analarmen kezdesý ótkizildi. Bıyl 25 qańtarda oblys ákiminiń keńesshisi, prokýratýra, polıtsııa departamenti, oblystyq bilim basqarmasy ókilderi, aýdandyq bilim bólimderiniń basshylary, psıhologııalyq qyzmetke jaýapty ádiskerler, sondaı-aq 130-dan astam jalpy bilim beretin mektepter men tehnıkalyq jáne kásiptik bilim berý uıymdarynyń pedagog-psıhologtarynyń qatysýymen jasóspimder arasyndaǵy býllıngtiń, zorlyq-zombylyqtyń aldyn alý taqyryptarynda oblystyq semınar-keńes ótti. Semınar barysynda qatysýshylar bala quqyqtaryn qorǵaý, turmystyq zorlyq-zombylyqtyń, jasóspirimder arasyndaǵy býllıng pen kıberbýllıngtiń aldyn alýǵa baılanysty ózekti máselelerdi talqylady, — dep habarlady Aqtóbe oblystyq bilim basqarmasynyń baspasóz qyzmeti.

Sonymen birge «JAN AHUAL» psıhologııalyq qoldaý ortalyǵy bilim berý uıymdarynyń dırektorlaryna, tárbıe jumysy jónindegi orynbasarlarǵa, pedagog-psıhologtarǵa aýtodestrýktıvti minez-qulyqtyń aldyn alý jáne sýıtsıd markerleri týraly aqparattandyrý-túsindirme jumystaryn ótkizgen.

Aıta keteıik, byltyr Aqtóbe oblysyndaǵy áskerı bólimde áskerı qyzmetshisi-sarbaz kóz jumdy. Bul týraly aqparatty Aqtóbe garnızonynyń baspasóz qyzmeti rastady. 

Сейчас читают