Aqtóbede kókjótel tirkele bastady

AQTÓBE. KAZINFORM – Aqtóbe oblysynda 18 adam kókjótelge shaldyqqan bolýy múmkin dep tekserildi. Aýyryp jatqan balalardyń kóbi vaktsına saldyrmaǵan. 

Aqtóbe oblysynda JRVI jáne tumaý, qyzylsha, kókjótel, koronavırýs sekildi adamnan adamǵa juǵatyn vırýstyń taralýy tómen. Alaıda epıdemıolog mamandar qyzylshaǵa jáne kókjótelge qarsy vaktsına qabyldaýǵa shaqyrdy. Búginde 10 400-den astam adam qyzylsha juqtyrýy múmkin dep tekserilip, onyń 46,5% saraptamasy oń nátıje kórsetti. Qyzylsha juqtyrǵandardyń kóbi ekpe almaǵan balalar bolǵan soń jappaı vaktsınatsııalaý júrgizildi. 50 myńǵa jýyq adam vaktsına saldyrdy. Al qazir kókjótelge qarsy vaktsınanyń mańyzy túsindirildi. Sebebi 2022 jyly kókjótel tirkelmese, 2023 jyly 33 adamnan anyqtaldy. Aýyrǵandardyń bári 14 jasqa tolmaǵan balalar. 

- Bıyl 18 adamnan kókjótel anyqtaldy. Kókjótelge shaldyqqan balalardyń 99% vaktsına saldyrmaǵan. Qazirgi kezde osy aýrý qıynǵa soǵa bastady. Bul aýrýǵa qarsy vaktsına bar ekenin eskertemiz. Sondyqtan turǵyndardy ımmýndaý sharasyna qatysýǵa shaqyramyn, - dedi Aqtóbe oblystyq sanıtarııalyq-epıdemıologııalyq baqylaý departamenti basshynyń orynbasary Muhtar Serbaev.

Onyń aıtýynsha kókjóteldiń kóbeıýiniń birneshe sebebi bar. Birinshiden, koronavırýs ınfektsııasy kezinde josparly ekpe qabyldaý keıinge shegerilip qaldy. Ekinshiden, balalardyń ata-analary maqsatty túrde vaktsınadan bas tartqan. 

- Vaktsınasyz vırýsty jeńý múmkin emes. Alypqashpa áńgimege, jel sózge erýdiń qajeti joq, - dedi Muhtar Serbaev.