Aqtóbede qoqys polıgony taǵy órtendi

AQTÓBE. QazAqparat - Keshe Aqtóbe qalasyndaǵy qoqys polıgonynan taǵy órt shyqty. Shahar ákimi Azamat Beket oqıǵa ornyna baryp, jaǵdaıdy baǵamdady, dep habarlaıdy QazAqparat tilshisi.

Aqtóbe qalasy ákimi baspasóz qyzmetiniń habarlaýynsha, 30 maýsym kúni saǵat 21:00 shamasynda qoqys polıgonynan órt shyqty. Oqıǵa ornyna shahar ákimi Azamat Beket «Dyshı, Aqtóbe» qoǵamdyq uıymynyń jetekshisi Evgenıı Lazarchýkpen birge bardy.

Qalalyq turǵyn-úı kommýnaldyq sharýashylyǵy bóliminiń uıymdastyrýymen órt sóndirý qyzmetiniń, «Tabys Aqtóbe» JShS jáne basqa da merdigerlerdiń arnaıy tehnıkalary tartyldy. Qala ákimi túngi aýysymda jumys barysyn toqtatpaı, qosymsha kúsh tartý arqyly jappaı topyraq tógip, órt oshaqtaryn sóndirý týraly tapsyrma berdi.

«Bıyl órt oqıǵasy birneshe ret qaıtalanyp otyr. Muny turǵyndar jaqsy biledi. Bul polıgon 2007 jyly ashylyp, búginge deıin qoqys qabyldady. Óziniń qabyldaý múmkindigin aıaqtady dese de bolady. Órtti sóndirý úshin jappaı topyraq tógilip jatyr», - dedi qala ákimi Azamat Beket.

Eske salsaq, bıyl maýsym aıynyń basynda qoqys polıgony órtenip, qalany kók tútin basqan bolatyn. Sol kezde ekologtar tekserý júrgizdi. «Zerthanalyq taldaý bóliminiń mamandary taldaý júrgizdi. Qoldaǵy aqparatqa súıensek, kómirtegi oksıdi 4,44 ese, azot dıoksıdi 16,3 ese, kúkirt dıoksıdi 13,9 ese asyp tur. Ekologııa departamenti qoqys polıgonyna jaýapty «Tabys Aqtóbe» JShS-ine jospardan tys tekserý taǵaıyndady. Kásipkerlik kodeksiniń talabyna sáıkes aldaǵy ýaqytta tekserý júrgizilip, kináli anyqtalsa, zań aıasynda jaýapqa tartylady», - degen edi Aqtóbe oblysy boıynsha ekologııa departamenti memlekettik ekologııalyq baqylaý bóliminiń basshysy Turar Qojanov.