Mereke kúnderi azamattar qandaı kómekke muqtaj - aqtóbelik dáriger
AQTÓBE. KAZINFORM - Aqtóbe oblystyq kópsalaly aýrýhanada qazir jedel járdemmen birge óz betimen kelip, travmatolog, neırohırýrgtiń kómegine júginip jatqan naýqastar bar.
Olar qulap, mertigip qalǵan. 1 qańtarda kimderge kómek kórsetilgenin travmatolog dáriger Abzal Qadyrbaev aıtyp berdi.
- Jańa jyl túni, búgin aqtóbelikter qandaı shaǵymmen túsip jatyr ?
- 31 jeltoqsanda jaraqatqa járdem berý bólimine barlyǵy 61 naýqas keldi. Onyń ishinde 53 adam úıine jiberildi. Olarǵa alǵashqy medıtsınalyq kómek kórsetildi. Jalpy sol 61 adamnyń 10-y jol-kólik apatynan zardap shekken, 5 adam soqqyǵy jyǵylǵan, eki adamdy janýar tistegen, bireýin kúıik shalǵan. Barlyǵy 8 adam aýrýhanaǵa jatqyzyldy. Onyń ekeýi travmatologııa, ekeýi bet-jaq hırýrgııa, úsheýi neırohırýrgııa, bireýi reanımatsııa bóliminde. Bul jerge adamdar túrli jaraqat alyp keledi. Іshimdik iship, kóńil-kúı kóterilip júrgen soń 31 jeltoqsan 1 qańtar kúnderi ǵana emes, 2-3 qańtarda kóp adam keledi. Mas kezde jaraqat alǵan adam sezbeı, júre beredi. Aıyqqan soń ǵana bilip, kómekke júginedi. Shydaǵanymen, ketedi dep oılaǵanymen olaı emes.
- Sol kúni, sol sátte kómekke júginbegenniń keri áseri bar ma ?
- Árıne, keri áseri bolady. Adam azǵasy árkimde ártúrli. Soǵan qaramastan adam 2-3 kún júrip qalsa, qolmen ornyna keltirý qıyndaý bolady. Sóıtip aýrýhanaǵa jatyp qalady. Synǵan súıek qantalaıdy, isik paıda bolady. Ornyna keltirý de qıyndaı beredi.
- Kóbine qandaı jaraqatpen keledi ?
- Árqalaı. Jol-kólik apatynan basy jarylyp ta keledi.
- Kimder sol kúni-aq keledi ?
- Kóbine jastar keledi. Úlkender «aýrýhanaǵa jatqyzyp tastaıdy» dep kelmeıdi. Jańa jyldy úıde ótkizgisi keledi.
- Kezekshilikke qanshalyqty jıi túsesiz ?
- Burynǵydaı kezekshilikke túspeımin. Kómek kerek kezde, adam tappaı jatqanda kezekshilikke shyǵamyn.
Eske salsaq, Aqtóbe qalasyndaǵy kópsalaly aýrýhananyń travmatologııa bólimine kúnine 60-70 adam túsedi.
