Aqtóbede QHR Bas konsýldyǵy ashyldy
AQTÓBE. KAZINFORM – Aqtóbe qalasynda Qytaı Halyq respýblıkasynyń Bas konsýldyǵy ashyldy. Ashylý saltanatyna QHR-dyń Qazaqstandaǵy Tótenshe jáne Ókiletti Elshisi Chjan Sıao qatysty.
QHR-dyń Qazaqstandaǵy Tótenshe jáne Ókiletti Elshisi Chjan Sıao aldymen oblys ákimi Ashat Shaharovpen kezdesti. Kezdesýde ekonomıka, saýda jáne mádenı baılanystar salasyndaǵy yntymaqtastyq máseleleri talqylandy.
Óńir basshysy Qazaqstan men Qytaı arasyndaǵy saýda-ekonomıkalyq yntymaqtastyq turaqty túrde damyp kele jatqanyna nazar aýdardy. Aqtóbe oblysynda Qytaı kásipkerleriniń qatysýymen 70-ten astam birlesken kásiporyn tabysty jumys istep tur. Aqtóbe oblysynyń bul elmen syrtqy saýda aınalymy 2024 jyldyń qańtar-mamyr aılarynda 472,7 mln AQSh dollaryna jetip, byltyrǵy kórsetkishten (402,2 mln dollar) asyp tústi. Eksport 401,6 mıllıon AQSh dollaryna deıin (ótken jyly 325,8 mıllıon dollarmen salystyrǵanda) ósti. Ashat Shaharov Qytaıdyń ınvestıtsııalyq qaýymdastyǵyn birlesken jobalarǵa qatysýyn keńeıtýge shaqyrdy.
Keıin Aqtóbe oblysynyń ákimi men QHR-dyń Qazaqstandaǵy Tótenshe jáne Ókiletti Elshisi Chjan Sıao QHR Bas konsýldyǵynyń ashylý saltanatyna qatysty.
- Bul kúnniń qytaı-qazaq arasyndaǵy qarym-qatynas jylnamasyna jazylary sózsiz. Eki eldiń dostyq baılanysyn odan ári nyǵaıtýǵa jasaǵan qadam dep te aıtýǵa bolady. QHR tóraǵasy Sı Tszınpınniń Qazaqstanǵa memlekettik saparynan soń Bas konsýldyqtyń ashylýy eki el arasyndaǵy kásipkerler men týrısterdiń artýyna septigin tıgizeri haq. Sondaı-aq 2025 jyl Qazaqstandaǵy Qytaı týrızmi jyly dep kelisilgeni belgili. Demek ınvestıtsııalyq ósim bolyp, qytaılyq týrısterdiń kóptep kelýine múmkindik jasalady. Byltyr Qytaı Qazaqstannyń eń iri saýda seriktesi boldy. Eki el arasyndaǵy taýar aınalymy 41 mlrd dollardy qurady. Al bıyl birinshi jartyjyldyqta taǵy 18% ósti. Aqtóbedegi Bas konsýldyq osy jumysty ári qaraı jandandyryp, aımaqaralyq qarym-qatynasty nyǵaıta túsedi ári iskerlik jáne mádenı-gýmanıtarlyq baılanysty arttyrady,- dedi QHR-dyń Qazaqstandaǵy Tótenshe jáne Ókiletti Elshisi Chjan Sıao.
Aqtóbe oblysynyń ákimi Ashat Shaharov ta sharanyń mańyzyna toqtaldy.
- Eki el – strategııalyq seriktes ári arada dostyq qarym-qatynas berik ornaǵan. Oǵan QR Prezıdenti Qasym-Jomart Toqaev pen QHR tóraǵasy Sı Tszınpınniń kezdesýi dálel. Búgingi shara sol kezdesýdegi kelisimniń jalǵasy dep bilemiz. Bıznes, saýda-ekonomıkalyq qarym-qatynas pen týrızmge oń áserin tıgizedi. Jyl ótken saıyn baılanys nyǵaıa túsedi dep esepteımiz. Dál osyndaı konsýldyq Sıan qalasynda da ashyldy. Ol konsýldyq ta baılanysty nyǵaıtýǵa septigin tıgizedi,- dedi Aqtóbe oblysynyń ákimi Ashat Shaharov.
Aıta keteıik, Aqtóbede úılestirý pýnkti de jumysyn bastaıdy.
