Aqtóbede depo bastyǵy para alyp sottaldy
ASTANA. KAZINFORM - «QTJ-Júk tasymaly» JShS «Batys» fılıaly Jem paıdalaný lokomotıv deposynyń bastyǵy sottaldy. Bul týraly Antıkor habarlady.
«Aqtóbe oblysy Muǵaljar aýdandyq soty „QTJ-Júk tasymaly“ JShS „Batys“ fılıaly Jem paıdalaný lokomotıv deposynyń bastyǵyna qatysty úkim shyǵardy. Ol lokomotıv deposynyń kadrlar jónindegi deldal-menedjeri arqyly adamdy teplovoz mashınısiniń kómekshisi laýazymyna ornalastyrý úshin 1,5 mln teńge somasynda para alǵany úshin kináli dep tanyldy», — delingen habarlamada.
Oǵan 3 jyl 6 aı merzimge bas bostandyǵynan aıyrý jazasy taǵaıyndaldy.
Sol úkimmen deldal 1 jylǵa 6 aıǵa bas bostandyǵynan aıyryldy, para bergen adam jáne onyń kómekshisi 3 jylǵa bas bostandyǵynan aıyryldy.
Sonymen qatar sottalǵandar memlekettik qyzmette jáne kvazımemlekettik sektor sýbektilerinde qyzmet atqarý quqyǵynan ómir boıyna aıyryldy.
Sot aktisi zańdy kúshine engen joq.
