Aqtóbede dárigerdi óltirgen meıirger sottaldy
AQTÓBE. KAZINFORM — Nursultan Shaımerdenov 20 jylǵa bas bosandyǵynan aıyryldy. Sonymen birge jábirlenýshilerge 10 mln teńge moraldyq shyǵyn tóleýi tıis.
Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy Nursultan Shaımerdenovke úkim shyqty. Ol Qylmystyq kodekstiń «Adam óltirý», «Urlyq» baptarymen aıypty dep tanyldy.
— Qylmystyq kodekstiń 99-baby 2-bóligi 8-tarmaǵy boıynsha 16 jyl, 188-baby 3-bóligi 1-tarmaǵy boıynsha 4 jyl 8 aı, túpkilikti 20 jyl bas bostandyǵynan aıyrý jazasy taǵaıyndalsyn. A.Aısaǵalıevtiń atynan berilgen azamattyq talap aryz ishinara qanaǵattandyrylsyn. Sottalýshy Nursultan Shaımerdenovten 2 837 321 teńge, zańdy ókiliniń shyǵyny retinde 3 mln teńge, moraldyq shyǵyn 10 mln teńge óndirilsin. Zattaı aıǵaqtar jábirlenýshi taraptyń ıeligine berilsin. Onyń ishinde 4 480 050 teńge, 50 eýro, saǵat, altyn buıymdar bar, — dedi sýdıa.
Úkimnen keıin Abaı Aısaǵalıevtiń jıeni sot úkimine kelisetinin, alaıda naǵashy aǵasy óziniń týǵan ákesindeı, balalaryna ata bolǵanyn aıtty.
— Biz sol kezde Almaty qalasynda júrdik. Baılanys úzilgende dereý jolǵa shyǵyp, 48 saǵatta keldik. Osy 48 saǵatta qatty alańdap, ýaıymǵa salyndyq. Aqtóbege kelgende naǵashymdy óltirip, muzdatqyshqa salyp, úıinen alyp ketkenin bildik. Biz adam sııaqty qoshtasa almadyq. Tek máıithanadan ákelip, janazasyn oqyp, jerledik. Jarty jyl boıy osy aýyrtpalyqpen júrdik. Jospary kóp edi. Múgedektik rásimdep, múlkiniń bárin satyp, Astanaǵa kóshýdi maqsat etti. Al ony asa jaýyzdyqpen óltirdi, — dedi Aıbek Kaýanov.
Aıta keteıik, bıyl nefrolog Abaı Aısaǵalıevti 31 jastaǵy meıirger óltirdi degen kúdikke ilikti. Ekeýi bir-birin tanıdy, bir emdeý ornynda jumys isteıdi. Meıirger dárigerdi óltirgen soń denesin muzdatqyshqa salyp, garajǵa, keıin kópqabatty úıdiń jertólesine aparady.
Keshe prokýror sottalýshyny aıypty dep tanyp, 20 jylǵa bas bostandyǵynan aıyrýdy surady.