Aqtóbe polıtsııasy joldaǵy myń kólikti ilestirip júrdi

AQTÓBE. KAZINFORM — Túnde ýaqytsha jabylǵan joldar búgin tańerteń ashyldy. Qaýipsizdik úshin polıtsııa myń kóliktiń aldyna shyǵyp, basqaryp júrdi.

Keshe Aqtóbede qar jaýyp, boran boldy. Qaýipsizdik úshin barlyq baǵyttaǵy jol jabylyp, polıtsııa kezekshilikke turdy. Búgin tańerteń qozǵalys qaıta jandandy.

— Turaqtarda, avtokempıngterde jáne avtomobıl joldarynyń boıynda jeńil kólikter, jolaýshylar avtobýstary men aýyr júk kólikterin qosa alǵanda myńnan asa kólik quraly jınaldy. Polıtsııa men tótenshe jaǵdaılar qyzmeti jaǵdaıdy táýlik boıy baqylap, qoǵamdyq tártip pen azamattardyń qaýipsizdigin qamtamasyz etti. 3 qańtar kúni tańerteń óńirdegi aýa raıy jaǵdaıy turaqtaldy. Jol jamylǵysynyń jaı-kúıi men qaýipsizdik deńgeıi baǵalanǵannan keıin qozǵalysty kezeń-kezeńimen qaıta jandandyrý týraly sheshim qabyldandy. Jol-kólik oqıǵalarynyń aldyn alý maqsatynda polıtsııa qyzmetkerleri kólik quraldaryn kolonnalarǵa biriktirip, olardy súıemeldeýdi uıymdastyrdy. Qozǵalys patrýldik ekıpajdardyń baqylaýymen, belgilengen jyldamdyq rejımin jáne barlyq qaýipsizdik sharalaryn saqtaı otyryp júzege asyrylyp jatyr, — dep habarlady Aqtóbe oblystyq PD baspasóz qyzmetiniń jetekshisi Erbolat Sarqulov.

Eske salsaq, Aqtóbede qar jınaýǵa jaýapty merdigerler úzilissiz jumys istep jatyr. Úsh kúnde 9 800 tekshe metr qar jınaldy.