Aqtóbe oblysynda úshem ómirge keldi
AQTÓBE. KAZINFORM – Aqtóbe oblysy Qandyaǵash qalasynda úshem jaryq dúnıe esigin ashty.
Aqtóbe oblystyq Densaýlyq saqtaý basqarmasy baspasóz qyzmetiniń habarlaýynsha, Muǵaljar aýdany Qandyaǵash qalasynyń turǵyny Gúlsaıa Qaljanova ómirge úshem ákeldi. Balalardyń esimi – Hamza, Ibrahım, Ahmad. Úsheýi de din aman, erteń úıine shyǵady.
– Bul otbasynyń tórt balasy bar. Bir qyz, úsh ul. Úshem ómirge kelip, endi ol 7 balanyń ata-anasy atanyp otyr. Anasy Gúlsaıa – Muǵaljar aýdany ákimdiginde is júrgizýshi, ákesi Ádilhan temirjol salasynda eńbek etedi. Balalardyń densaýlyǵy jaqsy. Ibrahım 2 985 gr, al Hamza men Ahmad 2 435 gr bolyp ómirge keldi, - dep habarlady Aqtóbe oblystyq Densaýlyq saqtaý basqarmasy baspasóz qyzmeti.
Eske salsaq, bıyl sáýir aıynda Aqtóbe perınataldyq ortalyǵynda Ádemi, Sulý, Dara atty úshem ómirge keldi.
