Aqtóbe Qazaqstandaǵy eń iri oblys atandy – Ońdasyn Orazalın

NUR-SULTAN. QazAqparat – Aqtóbe oblysynda halyq sany mıllıonǵa jýyqtady. Óńirdiń ekonomıkalyq-áleýmettik damýy týraly óńir ákimi Ońdasyn Orazalın aıtyp berdi, dep habarlaıdy QazAqparat tilshisi.

«Óńir ekonomıkasynyń damýy jáne jańa jumys oryndarynyń ashylýy ómir súrý deńgeıiniń jaqsarýyna, halyq sany men bala týý kórsetkishiniń ósimine alyp keldi. Táýelsizdik alǵan jyldary Aqtóbedegi halyqtyń ulttyq quramyna kelsek, basym kópshiligi basqa ulttar edi. Al qazir óńirdegi qazaqtardyń úlesi 85 paıyzdan asyp ketti. Myńdaǵan basqa ult ókilderi túrli sebepterin tarıhı otandaryna kóship ketti. Osylaısha, júz myńdaǵan adamdardyń kóshkenine qaramastan, Aqtóbeniń halyq sany artyp keledi. Mıgratsııalyq jaǵdaı men bala týý dınamıkasynyń joǵary bolýynan oblys halqynyń sany 900 myń adamnan asyp, mıllıonǵa jaqyndap qaldy. Jer kólemi boıynsha, keshegi oblystar bólingendikten, Qazaqstandaǵy eń iri oblys atandyq. Aqtóbe qalasynda 500 myńnan astam adam turýda. Munyń bári Aqtóbe óńiriniń damý kórsetkishterin, halyqtyń kóptep kóship kelýin kórsetedi», - dedi O. Orazalın Ortalyq kommýnıkatsııalar qyzmetinde ótken baspasóz máslıhatynda.

Ákimniń aıtýynsha, osy faktorlar óńirde turǵyn úı qurylysyna degen qajettilikti arttyrdy. Sońǵy 3 jylda oblysta jyl saıyn keminde 1 mln sharshy metr turǵyn úı paıdalanýǵa berildi.

«Ótken jyly 1,2 mln sharshy metr turǵyn úı iske qosyldy, bul 5 jyl burynǵy kórsetkishten 2 ese kóp jáne barlyq ýaqyttaǵy eń joǵarǵy kórsetkish. Bıyl da 1,3 mln sharshy metr turǵyn úıdi berý josparlanýda, 5 aıdyń ózinde 300 myń sharshy metr paıdalanýǵa berildi. Bul jerde ózderińizge belgili qurylystyń damýy ekonomıka ósiminiń negizgi draıveri bolyp tabylady. Soǵan erekshe mán berip otyrmyz», - dedi óńir ákimi.