Aqtaýǵa Irannan keletin týrısterdiń qatary artyp otyr
AQTAÝ. KAZINFORM — Iran astanasynan Aqtaýǵa qatynaıtyn charterlik reıspen kezekti týrıster ushyp keldi.
Naýryz aıynyń basynan beri óńirdiń kórnekti jerlerin aralaýǵa nıetti ırandyqtardyń úshinshi legi Aqtaýǵa taban tiredi. Byltyr týrıstik maýsym ashylǵan ýaqytta Iran Islam Respýblıkasynan Mańǵystaýǵa qatynaǵan týrıster legi kúzge deıin tolastamaǵan edi.
Jalpy Aqtaý qalasyna jyl basynan beri shetelderden 14 myńǵa jýyq týrıst kelgen. Al parsy elinen kelgen saıahatshylar 10 kún aıasynda oblystyń birneshe jerine barýdy kózdep otyr. Aqtaý qalalyq kásipkerlik jáne aýyl sharýashylyǵy bólimi basshysynyń orynbasary Ospan Nysannyń aıtýynsha, Aqtaýǵa týrısterdiń basym bóligi shetelden kelgen kórinedi.
«Aqtaý qalasynyń týrıstik áleýetin arttyrý baǵytynda birqatar jumystar jasalyp jatyr. Aqtaýǵa Tegerannan 112 jolaýshy charterlik reıspen ushyp keldi. Negizinen týrısterdiń basym bóligi Iran, sonymen qatar, Italııa, Reseı jáne Frantsııa elderinen qyzyǵýshylyq tanytýda», — dedi Ospan Nysan.
Buǵan deıin Naýryz merekesi qarsańynda Aqtaýǵa Tegerannan charterlik reıspen týrıster kelgen bolatyn. Bul rette shetelden keletinder oblystaǵy týrızmniń damýyna óz septigin tıgizetini aıtyldy.
