Aqtaýdaǵy 9 áskerı qyzmetshiniń qazasy: Vıtse-prezıdent kóńil aıtty
ASTANA. KAZINFORM — Vıtse-prezıdent Erlan Qarın Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
— Memleket basshysy Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty. Prezıdent Úkimettik komıssııaǵa oqıǵanyń mán-jaıyn anyqtaý úshin qajetti sharalar qabyldaýdy jáne qaıtys bolǵan jandardyń otbasyna kómek kórsetýdi tapsyrdy. Marqumdardyń jatqan jeri jaıly, topyraǵy torqa bolsyn. Qaıǵyǵa ortaqtasyp, qaza tapqandardyń otbasyna kóńil aıtamyn, olarǵa sabyr men tózim tileımin, — dep jazdy Erlan Qarın Instagram-daǵy paraqshasynda.
Sonymen qatar QR Quryltaıynyń tóraǵasy Aıbek Dádebaı da qaıǵyly oqıǵaǵa baılanysty kóńil aıtyp, iz-túzsiz ketken áskerı qyzmetshilerdi izdestirý jumystary jalǵasatynyn málim etti.
— Ózimniń jáne Qazaqstan Respýblıkasy Quryltaıynyń depýtattary atynan Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń otbasyna qaıǵyra kóńil aıtamyn. Memleket basshysynyń tapsyrmasymen Úkimettik komıssııa quryldy. Qaıǵyly oqıǵanyń mán-jaıy anyqtalyp, qaza tapqan áskerı qyzmetshilerdiń otbasylaryna qajetti kómek kórsetý boıynsha tıisti jumystar júrgizilip jatyr. Іz-túzsiz ketken áskerı qyzmetshilerdi izdestirý jumystary jalǵasady. Olardyń aman-esen tabylyp, otbasylaryna oralýyn tileımiz. Zardap shekken áskerı qyzmetshilerdiń tezirek saýyǵyp ketýine tilektespin, — dedi Quryltaı tóraǵasy.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy. Qalǵandaryn izdeý jumystary jalǵasyp jatyr.
Keıinirek áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy.
Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtin boldy.
