Aqtaýda zamanaýı Boks ortalyǵy paıdalanýǵa beriledi
AQTAÝ. QazAqparat - Aqtaý qalasynda salynyp jatqan jańa Boks ortalyǵynyń qurylysy 90% aıaqtaldy. Bul týraly Mańǵystaý oblysy qoǵamdyq kommýnıkatsııa ortalyǵynda ótken brıfıngide oblystyq Dene shynyqtyrý jáne sport basqarmasy basshysynyń orynbasary Qanat Jumabaev aıtty, dep habarlaıdy QazAqparat tilshisi.
Jospar boıynsha Boks ortalyǵy tamyz aıynda qoldanysqa berilmek. Munda sporttyń 6 túrimen aınalysýǵa múmkindik bolady. Olar: qazaq kúresi, boks, grek-rım kúresi, karate, taekvondo jáne aýyr atletıka. Sport keshenniń syıymdylyǵy 20 myń sharshy metr, janynda 99 adamǵa arnalǵan qonaqúı bar. Júzý basseıni, basketbol, voleıbol, fýtbol stadıondary bar.
Sonymen qatar, Mańǵystaý oblysynda «Jumyspen qamtýdyń jol kartasy» aıasynda birneshe sport nysany jóndeýden ótkizilmek. Olardyń 3-eýi Aqtaý qalasynda, 1-eýi Jańaózen kalasynda, úsheýi Mańǵystaý aýdanynda ornalasqan.
«Qyrkúıek aıynda sport túrlerinen QR Tuńǵysh Prezıdenti – Elbasynyń testilerin ótkizýdi josparlap otyrmyz. Bul – oblys dárejesinde osy jyldyń eń aýqymdy is-sharalarynyń biri bolmaq. Oblys boıynsha barlyq turǵyndardy Prezıdenttik testileýge shaqyramyn. Jeńimpazdar men júldegerler marapattalatyn bolady», - dedi oblystyq Dene shynyqtyrý jáne sport basqarmasy basshysynyń orynbasary Qanat Jumabaev.
