Aqtaýda taǵy eki adam sýǵa kete jazdady

AQTAÝ. KAZINFORM — Keshe, 6 maýsym 17:20 kezinde mobıldi bekette kezekshilikte turǵan tótenshe jaǵdaılar departamenti jedel qutqarý jasaǵyna demalýshylardan habar túsken. Olar Shora kanalynyń mańynda teńizde eki er adamnyń sýǵa batyp bara jatqanyn jetkizgen. 

Qutqarýshylar oqıǵa ornyna qaıyqpen jedel jetip, 1999 jyly týǵan eki er adamdy qutqardy.

Olar jaǵadan 350 metr qashyqtyqqa júzip, óz kúshimen keri jete almaǵan. 

Qutqarýshylar ekeýine de jedel járdem kelgenshe alǵashqy medıtsınalyq kómek kórsetken. 

Al jedel járdem kelgennen keıin, bir er adam aýrýhanaǵa jatqyzyldy. 

Ekinshi qutqarylǵan adamǵa statsıonarlyq medıtsınalyq kómek qajet bolmaǵan. 

Qazirgi tańda atalǵan tulǵalardy ákimshilik jaýapkershilikke tartý boıynsha jumys júrip jatyr. 

Aıta keteıik, kúni keshe Qaraqııa aýdany Quryq kentinde 2 jasar bala teńizge batyp kóz jumǵan edi. 

Osy oqıǵalarǵa baılanysty Mańǵystaý oblystyq tótenshe jaǵdaılar departamenti mamandary turǵyndar men qonaqtarǵa teńizge túserde sýdaǵy qaýipsizdik erejelerin saqtaýǵa shaqyrdy.