Aqtaýda sarbazdarǵa kredıttik kanıkýl berildi
AQTAÝ. KAZINFORM – Aqtaýda teńiz jaıaý áskerleri brıgadasynyń júzge jýyq sarbazy kredıttik kanıkýl aldy.
Jaýyngerlerdiń áskerge shaqyrylǵanǵa deıin alynǵan nesıeleri bolǵan. Sondyqtan áskerı bólim men ekinshi deńgeıli qarjy uıymdary arasynda kelisimsharttar jasalyp, qaryzdy keıin óteýge ótinish berildi. Sonyń negizinde bank sarbazdardyń bereshegin qaıtarý merzimin 13 aıǵa deıin shegerdi. Endi merzimdi áskerı qyzmetshi bir jyl armııada bolǵan soń úıge oralyp, bir aıdan keıin nesıe tólemin tóleýdi qaıta jalǵastyrady.
Gvardııa qatardaǵy jaýyngeri Ulan Manarbekov mundaı múmkindik berilgenine qýanyshty. Ol áskerge shaqyrtylǵanǵa deıin bankten 200 myń teńge nesıe alǵan.
«Osydan 6 aı buryn alǵam. Bir jylǵa jáne jańaǵy bir aı qosylyp, ózim jumys istep jalaqymdy alǵansha sondaı merzimge kredıt toqtalady eken. Qazir ózim esh ýaıymsyz áskerı qyzmetimdi oryndap jatyrmyn», - deıdi sarbaz.
№25744 Áskerı bólimi artıllerııalyq dıvızon komandıriniń orynbasary Súndet Tóle kredıttik kanıkýl alýdyń talabyn túsindirdi.
«Bul sharalar sarbazdardyń áskerı boryshyn alańsyz atqarýy úshin jasalyp jatyr. Áskerı bólimde qyzmet etedi degen anyqtama men sarbazdyń jeke kýáligin alyp, bankke baramyz. Bankter sol qujattardy qarastyryp, bizge jaýabyn beredi. 13 aı merzimge sarbazdardyń kredıtteri toqtatylady», - deıdi áskerı qyzmetshi.
