Aqtaýda karantın erejesin buzǵandar jazalandy
Aqtaý qalalyq kásipkerlik jáne ónerkásipti damytý bólimi, qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasy qyzmetkeri jáne jergilikti polıtsııa ókilimen birlesken top qaladaǵy 7 iri azyq-túlik saýda nysandaryna kezekti monıtorıng júrgizdi.
Basty maqsat - bas sanıtarlyq dárigerdiń 4 shilde kúni qabyldaǵan qaýlysyna sáıkes sanıtarlyq normalardyń qatań saqtalýyn baqylaý. Monıtorıng nátıjesinde 6 azyq-túlik ornynda tutynýshylardyń ystyǵyn ólsheý quraldary, qyzmetkerlerdiń dene temperatýrasyn tirkeý men ǵımaratqa júrgizilgen tazalyq jumystary týraly jýrnaldardyń, sonymen qatar kassalarda antıseptık pen keıbir qyzmetkerlerdiń qolǵaptarynyń joqtyǵy anyqtaldy.
Sanıtarlyq talaptardy buzǵan nysan ıelerinen túsinikteme alynyp, tıisti akt toltyryldy. «Olarǵa ákimshilik quqyq buzýshylyq týraly kodekstiń 425-babyna sáıkes, hattama toltyryldy. Endi 30 ben 200 AEK aralyǵynda aıyppul salynbaq. Budan bólek, 28 shaǵynaýdanda ornalasqan «Aman» sýpermarketi ıesine saqtalýǵa tıisti sanıtarlyq talaptardy bir jylda eki ret buzǵany úshin qatań túrde shara qoldanylady»,- dedi Aqtaý qalalyq kásipkerlik jáne ónerkásipti damytý bóliminiń basshysy Baýyrjan Sapa.